தோற்றுப்போன அமைச்சர்கள்

சிறிலங்காவில் நடைபெற்று முடிந்த நாடாளுமன்றத் தேர்தலில் விருப்பு வாக்குகளின் விபரங்கள் இன்னமும் முழுமையாக வெளியிடப்படாத அதேநேரம் தேர்தல் வன்முறைகள் இடம்பெற்றமையின் காரணமாக இரண்டு மாவட்டங்களில் [திருக்கோணமலை, கண்டி] மீள்வாக்குப்பதிவு மேற்கொள்ளுவதற்குத் திட்டமிடப்பட்டிருக்கிறது. ஐக்கிய தேசியக் கட்சியிலிருந்து ஆளும் ஐக்கிய மக்கள் சுதந்திரக் கூட்டமைப்புக்குத் தாவிய அமைச்சர்களான வெளிவிவகார அமைச்சர் றோகித போகல்லாகம, நீதி மற்றும் சட்ட மறுசீரமைப்பு அமைச்சர் மிலிந்த மொறொகொட ஆகியோர் தங்களது ஆசனங்களை இழந்துள்ளனர். மட்டக்களப்பு மாவட்டத்தினைப் பொறுத்தவரையில் மொத்த வாக்குகளில் 9.35 சதவீத வாக்குகளைப் மட்டும் பெற்றிருக்கும் கிழக்கு மாகாண முதலமைச்சர் சிவநேசதுரை சந்திரகாந்தனின் தலைமையிலான 'தமிழ் மக்கள் விடுதலைப் புலிகள்' ஒரு ஆசனத்தையேனும் தனதாக்கவில்லை. அதேநேரம் வடக்கு மற்றும் கிழக்கு மாகாணங்களில் முன்னணியில் திகழும் தமிழ்த் தேசியக் கூட்டமைப்பு வெளிவந்த முடிவுகளின் அடிப்படையில் அடுத்த நாடாளுமன்றில் 12 ஆசனங்களைப் பெற்றிருப்பதுடன் மூன்றாவது பலமான கட்சியாகவும் விளங்குகின்றது. இதுவரைக்கும் வெளியான விருப்பு வாக்குகளின் விபரத்தின்படி 200,000 விருப்புவாக்குகளைத் தனதாக்கியிருக்கும் தேசிய சனநாயக முன்னணியின் தலைவர் விமல் வீரவன்ச அதிகூடிய விருப்பு வாக்கினைப் பெற்று முன்னணியில் திகழ்கிறார். தேசியவாதக் கட்சியான ஜாதிக ஹெல உறுமையவினைச் சேர்நத சுற்றுச்சூழல் அமைச்சர் சம்பிக்க ரணவக்க அதிகூடிய விருப்புவாக்குகளைப் பெற்றவர்களில் இரண்டாம் நிலையில் இருக்கிறார்கள். இவரைத் தொடர்ந்து அமைச்சர் தினேஸ் குணவர்த்தன மூன்றாம் இடத்தில் இருக்கிறார். அரசியலுக்குள் புதிதாக நுழைந்திருக்கும் கிரிக்கெற் விளையாட்டு வீரரான சனத் ஜெயசூரிய மாத்தறை மாவட்டத்தில் அதிகூடிய விருப்பு வாக்குகளைப் பெற்றுப் நாடாளுமன்றம் செல்கிறார். அதேநேரம், மகிந்த ராஜபக்சவினது கூட்டணி அரசாங்கத்தில் அமைச்சராக இருந்த, நாட்டுக்கு உலகக்கோப்பையினை வென்றுகொடுத்த கிரிக்கெட் அணியின் தலைவர் அருச்சுனா ரணதுங்க குருணாகலை மாவட்டத்தில் ஆசனத்தினைக் கைப்பற்றியிருக்கிறார். மகிந்த அரசிலிருந்து விலகிய அருச்சுனா ரணதுங்க ஜெனரல் சரத் பொன்சேகாவின் தலைமையிலான சனநாயகத் தேசிய முன்னணியுடன் இணைந்து தேர்தலில் போட்டியிட்டமை இங்கு குறிப்பிடத்தக்கது. கொழும்பு மாவட்டத்தில் போட்டியிட்ட ஐக்கிய தேசியக் கட்சியின் தலைவர் ரணில் விக்கிரமசிங்க எதிர்க்கட்சிகள் மத்தியில் அதிகூடிய விருப்புவாக்கினைப் பெற்றுப் நாடாளுமன்றம் செல்கிறார். முன்னாள் சிறிலங்காவும் மலேசியாவிற்கான சிறிலங்காவினது தூதுவருமான றோசி சேனநாயக்கவும் கொழும்பு மாவட்டத்தில் அதிகப்படியான விருப்பு வாக்குகளைத் தனதாக்கியிருக்கிறார். கம்பகா மாவட்டத்தினைப் பொறுத்தவரையில் குடியரசு அதிபரின் சிறப்பு ஆலோசகரும் அவரது சகோதரருமான பசில் ராஜபக்ச அதிகூடிய விருப்பு வாக்குகளைப் பெற்றிருக்கிறார். மறைந்த அமைச்சர் ஜெயராஜ் பெர்னாண்டோபுள்ளேயினது துணைவியார் கலாநிதி சுதர்சினி பெர்னாண்டோபுள்ளே கம்பகா மாவட்டத்தில் இரண்டாவது அதிகூடிய விருப்பு வாக்குகளைப் பெற்றிருக்கிறார். சர்ச்சைக்குரிய அமைச்சர் கலாநிதி மேவின் சில்வா இந்த மாவட்டத்தில் மூன்றாவது இடத்தில் இருப்பதாகச் சொல்லப்படுகிறது. பொலனறுவை மாவட்டத்தில் போட்டியிட்ட அமைச்சர் மைத்திரிபால சிறிசேன மற்றும் பதுளை மாவட்டத்தில் போட்டியிட்ட நிமல் சிறீபால டீசில்வா ஆகியோர் அந்தந்த மாவட்டங்களில் அதிகூடிய விருப்பு வாக்குகளைப் பெற்றிருக்கிறார்கள். அதேநேரம் களுத்துறை மாவட்டத்தில் போட்டியிட்ட அமைச்சர் நந்தன குணதிலகை தனது ஆசனத்தினை இழந்திருக்கிறார். இரத்தினபுரி மாவட்டத்தினைச் சேர்ந்த அமைச்சரான வாசுதேவ நாயணக்கார பாராளுமன்றில் தனது இடத்தினைத் தக்கவைத்திருக்கும் அதேநேரம், அமைச்சர் மகிந்த ரத்தினதிலக தனது ஆசனத்தினை இழந்துவிட்டதாகச் சொல்லப்படுகிறது. கண்டி மற்றும் திருகோணமலை மாவட்டங்களில் மீள்வாக்குப்பதிவு நடாத்தப்படும் வரைக்கும் நடைபெற்றுமுடிந்த நாடாளுமன்றத் தேர்தலின் இறுதி முடிவு வெளியிடப்படமாட்டாது.

நாம் தமிழர் இயக்கத்தின் கொடி அறிமுக விழா!

2008 ஆம் ஆண்டு ஈழத்தின் நான்காம் கட்ட போரின் கடைசி யுத்தத்தில் சிங்கள பேரினவாத அரசு இந்தியா, சீனா, பாகிஸ்தான் மற்றும் பல நாடுகளுடன் சேர்ந்து கொண்டு தமிழின படுகொலையை நிகழ்த்த ஆரம்பித்த தருணத்தில் தமிழகம் முழுவதுமே இந்தியாவின் துரோகச் செயலைக் கண்டித்து கொந்தளிக்க ஆரம்பித்தது. 16 தமிழர்கள் தங்களது தேக்குமர உடலை தீயிட்டு எரித்து ஈழத்தமிழினத்தைக் காப்பதற்கு குரல் கொடுத்து மடிந்தனர். செந்தமிழன் சீமான் தமிழகம் முழுவதும் ஈழத்தமிழர்களைப் பாதுகாக்கக் கோரி தமிழகர்களிடையே சூறாவளி பரப்புரை மேற்கொண்டார். தமிழகத்தில் மக்கள் அனைவரும் கொதித்தெழுந்தப் போதிலும் தமிழக அரசோ அல்லது மத்திய அரசோ கண்டு கொள்ளாதது மட்டுமன்றி ஈழத்தமிழினப் படுகொலைக்கு பல்வேறு வகையிலே சிங்கள அரசோடு தோளோடு தோள் நின்றது. அதன் காரணமாக மே 16 தொடங்கி 18-க்குள்; 50,000 அப்பாவித் தமிழ் மக்கள் படுகொலை செய்யப்பட்டு, மிகப்பெரும் அழிவை தமிழினம் சந்தித்தபோது, தாய் தமிழகம் மட்டுமன்றி உலகம் முழுவதும் வாழும் 9 கோடி தமிழர்களும் அதிர்ச்சியோடு நெஞ்சடைத்து நின்றனர். தமிழகத்தில் மக்கள் அனைவருமே ஈழத்தமிழினத்தை பாதுகாக்க சீமான் பின்னே திரண்டு நின்றப் போதிலும் அரசியல் பலம் இல்லாத ஒரே காரணத்தினால் தமிழினம் இனப்படுகொலையை சந்திக்க நேர்ந்தது. அரசியல் அதிகாரத்தை மக்கள் சக்தியோடு அடையவே செந்தமிழன் சீமான் நாம் தமிழர் இயக்கத்தை ஒரு அரசியல் கட்சியாக மாற்றினார். அக்கட்சியின் கொடியை நாளை (ஏப்ரல் மாதம் 10 ஆம் நாள்) அறிமுகம் செய்கிறார். தஞ்சாவூர் திலகர் திடலில் உள்ள பேரரசன் ராசராசன் அரங்கத்தில் இந்நிகழ்ச்சி பெரிதொரு நிகழ்வாக நடந்தேற உள்ளது. பேராசிரியர் தீரன் அவர்கள் கொடி விளக்க அறிமுக உரை மேற்கொள்கிறார். மற்றும் அந்நிகழ்ச்சியில், ஆவல கணேசன், தமிழ் முழக்கம் சாகுல் அமீது, பேராயர் சூசை, முனைவர் தா.மணி, வழக்குரைஞர்கள் நல்லதுரை, மணிசெந்தில், ரா.வீரகுமரன், மூ.கருணாநிதி மற்றும் மாவட்ட ஒருங்கிணைப்பாளர்கள் காமராஜ், சக்திவேல் மற்றும் பலர் இந்நிகழ்ச்சியில் பங்குபெற உள்ளனர். இன்று, இந்திய நேரப்படி மதியம் 3 மணி அளவில் பேரணியும் அதைத் தெடர்ந்து 5 மணி அளவில் தேனிசை செல்லப்பாவின் தமிழிசை நிகழ்ச்சித் தொடங்கி, கொடி அறிமுக விழாவும், மாநாடும் நடைபெற உள்ளது. இந்திய நேரப்படி மதியம் 4 மணியிலிருந்து நிகழ்ச்சிகளை நேரடிக் காட்சிகளாக www.naamtamilar.org எனும் இணையதளத்தில் பார்க்கலாம். இந்நிகழ்ச்சிக்கு தமிழகம் முழவதிலுமிருந்து பெண்கள், குழந்தைகள், இளைஞர்கள் என அனைத்து தரப்பு மக்களும் அலைகடலென ஆர்ப்பாரித்தவாறு தஞ்சையை நோக்கி பயணம் மேற்கொண்டுள்ளனர். உலகம் முழவதிலும் உள்ள அனைத்துக் கண்டங்களிலும் வாழும் தமிழர்கள், ஆவலோடு, செந்தமிழன் சீமானின், விழா நிறைவுப் பேருரையை கேட்பதற்கு எதிர்பார்த்து கொண்டிருக்கின்றனர்.

தோல்விகண்ட முன்னாள் நாடாளுமன்ற பிரபலங்கல்

அம்பாறை மாவட்டத்தில் ஆளும் ஐக்கிய மக்கள் சுதந்திரக்கட்சியின் சார்பில் போட்டியிட்ட முன்னாள் அமைச்சர் பேரியல் அஷ்ரப் தோல்வியடைந்துள்ளதாக தெரியவருகிறது. பேரியல் அஷ்ரப் நுஆ என்றழைக்கப்படும் தேசிய ஐக்கிய முன்னணிக்கட்சியின் முன்னாள் தலைவியாவார். நாடாளுமன்றத்தேர்தலுக்கு முன்னர் சிறீலங்கா சுதந்திரக்கட்சியின் அங்கத்துவம் பெற்று ஜனாதிபதி மஹிந்த ராஜபக்ஸவுடன் இவர் இணைந்துகொண்டார். பேரியல் அஷ்ரபுடன் இணைந்து சுதந்திரக்கட்சியின் அங்கத்துவத்தைப் பெற்றுக்கொண்ட முன்னாள் முஸ்லிம் காங்கிரஸ் நாடாளுமன்ற உறுப்பினர் சம்மாந்துறை ஏ.எம்.எம். நௌஷாத்தும் இத்தேர்தலில் தோல்விகண்டுள்ளார். 2004 ஆம் ஆண்டு தேர்தலில் சிறீலங்கா முஸ்லிம் காங்கிரஸ் மூலம் தெரிவாகி ஆளும் கட்சியில் இணைந்து கொண்ட முன்னாள் அமைச்சர் எஸ்.எச்.அமீர் அலி, இலங்கை தமிழரசுக் கட்சி சார்பில் தெரிவான தங்கேஸ்வரி கதிர்காமர் ஆகியோர் இம் முறை ஐக்கிய மக்கள் சுதந்திர முன்னனி சார்பில் போட்டியிட்ட போதிலும் வெற்றிபெறவில்லை. கடந்ததேர்தலில் தமிழரசுக் கட்சி சார்பில் போட்டியிட்டு இம்முறை தமிழ்க் காங்கிரசில் போட்டியிட்ட முன்னாள் நாடாளுமன்ற உறுப்பினர்கள் கNஐந்திரகுமார் பொன்னம்பலம், பத்மினி சிதம்பரநாதன், கஜேந்திரன், மற்றும் இடதுசாரி முன்னணியில் போட்டியிட்ட எம்.சிவாஜிலிங்கம், சிறீகாந்தா ஆகியோரும் தோல்வி அடைந்துள்ளனர். இவை தவிர ஐக்கியதேசியக் கட்சி மற்றும் ஆளும் ஐக்கியமக்கள் சுதந்திரக் கூட்டமைப்புக் கட்சிகளில் முன்னர் நாடாளுமன்ற உறுப்பினர்களாகவும் அமைச்சர்களாகவும் இருந்த பலர் இம்முறை தோல்விஅடைந்திருப்பதாக கூறப்படுகிறது. இதில் மலையகத்தில் வடிவேல்சுரேஸ், சச்சிதானந்தன் ஆகியோர் உள்ளடங்குவதாக தெரியவருகிறது. இவை தவிர நாளை விருப்புவாக்குகள் வெளியாகிய பின்பே தோல்வியடைந்த ஏனைய பிரபல்யங்கள் குறித்து தெரிய வரும் எனக் கூறப்படுகிறது.

நாடாளுமன்றதேர்தலில் ஆளும்கட்சி முன்னணியில் ?

சிறீலங்காவில் நேற்று நடைபெற்ற பொதுத்தேர்தலில் ஆளும் ஐக்கிய மக்கள் சுதந்திர முன்னனி பெரும் வெற்றி பெற்றுள்ளது. 117 ஆசனங்களை கைப்பற்றியுள்ள ஆளும் கூட்டணி 24 தேசியப் பட்டியல் ஆசனங்களையும் பெறும் சாத்தியங்களை கொண்டுள்ளதாக தெரிவிக்கப்படுகின்றது. இது தொடர்பில் மேலும் தெரியவருவதாவது: சிறீலங்காவில் நேற்று வியாழக்கிழமை (8) நடைபெற்ற பொதுத்தேர்தலில் சிறீலங்கா அரச தலைவர் மகிந்தா ராஜபக்சா தலைமையிலான ஐக்கிய மக்கள் சுதந்திர முன்னனி பெரும் வெற்றி பெற்றுள்ளது. 225 ஆசனங்களை கொண்ட சிறீலங்கா நாடாளுமன்றத்திற்கான தேர்தலில் 196 உறுப்பினர்கள் நேரிடையாக தேர்ந்தெடுக்கப்படுவதுண்டு. நேற்று நடைபெற்ற தேர்தலில் ஐக்கிய மக்கள் சுதந்திர கூட்டணி 117 ஆசனங்களை கைப்பற்றியுள்ளது, மேலும் 24 தேசியல் பட்டியல் உறுப்பினர்களையும் அது பெறக்கூடும் என தெரிவிக்கப்படுகின்றது. எனவே மொத்தம் 141 ஆசனங்களை பெற்று இலகுவாக அரசு அமைக்கும் சாத்தியங்களை அது ஏற்படுத்தியுள்ளது. மேலும் மூன்றில் இரண்டு பெரும்பான்மையை பெறுவதற்கு அதற்கு 9 ஆசனங்களே தேவை என்ற இலகுவான இலக்கும் எட்டியுள்ளது. சிறீலங்காவின் பிரதான எதிர்க்கட்சியான ஐக்கிய தேசியக் கட்சி 46 ஆசனங்களையும், தமிழ்த் தேசிய கூட்டமைப்பு 12 ஆசனங்களையும் கைப்பற்றியுள்ளன. ஜெனரல் சரத் பொன்சேகாவின் ஐனநாயக தேசிய முன்னனி 5 ஆசனங்களை கைப்பற்றியுள்ளது. எனினும் கண்டி மற்றும் திருமலை ஆகிய மாவட்டங்களில் இறுதி முடிவுகள் இதுவரை அறிவிக்கப்படவில்லை. தேர்தல் முறைகேடுகள் நடைபெற்றுள்ளதால் அவை தாமதமாகி வருவதாக தேர்தல் திணைக்கள வட்டாரங்கள் தெரிவித்துள்ளன. இந்த தேர்தல் வெற்றி என்பது மகிந்தாவின் போர் வெற்றிக்கு கிடைத்த மிகப்பெரும் பரிசு என மகிந்த ராஜபக்சாவின் பேச்சாளர் சந்திரபாலா லியனகே தெரிவித்துள்ளார். சிறீலங்காவின் தேர்தல் வரலாற்றில் எந்த கட்சியும் இவ்வாறான வெற்றியை பெற்றதில்லை என அவர் மேலும் தெரிவித்துள்ளார். ஆனால் தேர்தலில் மக்கள் வாக்களித்த வீகிதம் மிகவும் குறைவானது என தகவல்கள் தெரிவித்துள்ளன. மேலும் தேர்தல் வன்முறைகளை தொடர்ந்து 22 தேர்தல் தொகுதிகளில் இரு தொகுதிகளில் மீள் வாக்கெடுப்பு நடைபெறலாம் என்ற சந்தேகங்களும் ஏற்பட்டுள்ளன. அவ்வாறு நடைபெற்றால் எதிர்வரும் 19 ஆம் நாளே 16 ஆசனங்கள் தொடர்பான அறிவித்தல்கள் வெளிவரும். இதனிடையே மேலும் 9 உறுப்பினர்களின் ஆதரவுகளைப் பெற்று மகிந்தா ராஜபக்சா மூன்றில் இரண்டு பெரும்பான்மையை பெற்றால் அவர் நாட்டின் அரசியல் யாப்புக்களில் சில மாற்றங்களை கொண்டுவரலாம் என எதிர்பார்க்கப்படுகின்றது. அதாவது ஒருவர் இரு தடவைகள் மட்டும் தான் அரச தலைவராக இருக்கலாம் என்ற அரசியல் சட்டத்தை மாற்றி ஒருவர் பல தடவைகள் அரச தலைவராக இருக்கலாம் என்ற சட்டத்தை அவர் கொண்டு வரலாம் என அனைத்துலக ஊடகம் ஒன்று தெரிவித்துள்ளது. எனினும் தற்போதைய அரசின் நடவடிக்கைகளில் மக்கள் நம்பிக்கை இழந்துள்ளதை தான் மிகவும் குறவான மக்கள் வாக்களித்தது எடுத்துக் காட்டுவதாக அரசியல் ஆய்வாளர் விக்டர் இவான் தெரிவித்துள்ளார். 50 விகிதமான மக்கள் வாக்களிப்பது தொடர்பில் கவலை கொள்ளவில்லை என அவர் மேலும் தெரிவித்துள்ளார். புதிய அரசுக்கு மக்களிடம் உள்ள ஆதரவு தொடர்பில் சந்தேகங்கள் ஏற்பட்டுள்ளதாக மனித உரிமை செயற்பாட்டாளரும், அரசியல் ஆய்வாளருமான நிமல்கா பெர்னாண்டோ தெரிவித்துள்ளார். அதாவது அரைப் பங்கு மக்கள் வாக்களிக்கவில்லை என்பது அரசுக்கு உளவியலான ஆதரவுகளை மக்கள் வழங்கப்போவதில்லை என்பதை எடுத்துக் காட்டுவதாக அவர் மேலும் தெரிவித்துள்ளார். விடுதலைப்புலிகளை தோற்கடித்த தலைவர் மகிந்தா என்பதால் தான் அவருக்கே வாக்களித்ததாக தென்னிலங்கையை சேர்ந்த செத்மினி சற்துரிகா (28) தெரிவித்துள்ளார்.

தமிழீழ தேசிய இராணுவத்தின் ஆயுதங்கள் மௌனிக்கப்பட்ட நிலையில் ..................................

அக்கரைப்பற்று நகரில் உள்ள பஸ் தரிப்பிடத்தில் காத்துநிற்கும் தமிழ் பெண்கள் அப்பகுதியில் ஆட்டோ தரிப்பிடத்தில் உள்ள முஸ்லிம் ஆட்டோ சாரதிகளினால் துன்புறுத்தலுக்குள்ளாக்கப்படுவதாக தெரிவிக்கப்பட்டுள்ளது. தமிழீழ விடுதலைப்புலிகளின் ஆயுதங்கள் மௌனிக்கப்பட்டுள்ள இந்த வேளையில் இரு இனங்களும் செறிந்துவாழும் அக்கரைப்பற்றில் இவ்வாறான செயல்களில் முஸ்லிம் ஆட்டோ சாரதிகள் ஈடுபடுவது தொடர்பில் கவலைவெளியிடப்பட்டுள்ளது. நேற்று புதன்கிழமை இரவு அக்கரைப்பற்று பஸ் நிலையத்தில் அட்டாளைச்சேனை ஆசிரிய கலாசாலையில் பயிலும் மலைய பகுதிக்கு செல்லவிருந்த ஆசிரிய பயிலுனர் தமிழ் யுவதிகள் சிலரை அவ்விடத்தில் மதுபோதையில் நின்ற முஸ்லிம் ஆட்டோ சாரதிகள் வழிமறித்து குறித்த பெண்களை தூஸன வார்த்தைகளினால் திட்டியதுடன் பாலியல் துன்புறுத்தல்களில் ஈடுபட்டதாகவும் தெரிவித்தனர். இது தொடர்பில் குறித்த யுவதிகள் அவ்வழியால் சென்ற ஆசிரியர் ஒருவரிடம் இது தொடர்பில் முறையிட்டு அவர் மூலம் கிழக்கு மாகாண அமைச்சர் நவரெட்னராசாவின் கவனத்துக்கு இச்சம்பவம் கொண்டுசெல்லப்பட்டது. அவர் அக்கரைப்பற்று பொலிஸாரிடம் முறையிட்டு அக்கரைப்பற்று பொலிஸாரின் துணையுடன் அப்பகுதிக்கு சென்று இது தொடர்பில் விசாரணைசெய்தபோது குறித்த ஆட்டோசாரதிகள் நவரெட்னராசாவை தாக்கமுற்பட்டதாக தெரிவிக்கப்பட்டுள்ளது. இந்த சமயத்தில் குறித்த இடத்தில் நின்ற பொலிஸாரும் எந்த நடவடிக்கையும் எடுக்கவில்லையெனவும் விசாரணைக்கு வந்த பொலிஸாரும் எந்தவித நடவடிக்கையும் எடுக்காமல் திரும்பிச்சென்றதாகவும் தெரிவிக்கப்பட்டுள்ளது. யார் இந்த முஸ்லிம் ஆட்டோ சாரதிகள்? அக்கரைப்பற்று பஸ்நிலையம் கடந்த காலத்தில் தமிழ் மக்களின் பிரதேசமாகவே இருந்து வந்த நிலையில் அக்கரைப்பற்றில் அமைச்சர் அதாவுல்லாவின் அரசியல் செயற்பாடுகள் காலூன்ற ஆரம்பமானது தொடக்கம் தமிழர்கள் இப்பகுதியில் இருந்து அப்புறப்படுத்தப்பட்டுவந்துள்ளனர். இதற்காக அக்கரைப்பற்றில் முஸ்லிம் இளைஞர்களைக்கொண்டு தெற்காசியாவில் உள்ள முஸ்லிம் நாடொன்றின் உதவியுடன் ஆயுதக்குழுவொன்றையும் அமைத்துள்ளார். இவர்கள் கடந்த காலங்களில் அக்கரைப்பற்று நகரில் தமிழ் மக்களுக்கெதிரான பல்வேறு நடவடிக்கைகளில் ஈடுபட்டதுடன் அக்கரைப்பற்று நகரில் வர்த்தக நடவடிக்கையில் ஈடுபட்டிருந்த தமிழர்களையும் அங்கிருந்து விரட்டியடித்துவிட்டு வர்த்தக நடவடிக்கைகளை தமக்கு சொந்தமாக்கிக்கொண்டனர். அத்துடன் இந்த ஆயுதக்குழுவினர் இப்பகுதியில் கஞ்சா,அவின் போன்ற வியாபாரங்களை அக்கரைப்பற்று நகரில் மேற்கொண்டுவருவதுடன் ஏனை போதைப்பொருள் கடத்தல்களில் ஈடுபட்டுவருகின்றனர். விடுதலைப்புலிகள் ஆயுதங்கள் உள்ள காலத்தில் வெளியே வரத்தயங்கிய இவர்கள் இன்று அதாவுல்லாவின் நிதி ஒதுக்கீட்டில் ஆட்டோக்களை வாங்கி தமிழ்-முஸ்லிம் மக்களின் எல்லைப்பகுதியில் செயற்பட்டுவருகின்றனர். கடந்த மாதமும் இப்பகுதியில் கடமைமுடிந்து விடுமுறையில் செல்லவிருந்த இராணுவவீரர் ஒருவரும் இந்த குழுவினரால் கத்திக்குத்துக்குள்ளானதாகவும் தெரிவிக்கப்பட்டுள்ளது. இவ்வாறான நிலையில் தினமும் அக்கரைப்பற்று நகரில் பல்வேறு தேவைகளுக்கு செல்லும் தமிழ் யுவதிகளை வழிமறிக்கும் இவர்கள் பல்வேறு பல்வேறு தூஸன வார்த்தைகளினால் திட்டிவருவதாகவும் பாலியல் துன்புறுத்தல்கள் மேற்கொள்ளுவதாகவும் தெரிவிக்கப்பட்டுள்ளது. இது தொடர்பில் அக்கரைப்பற்று பொலிஸ் நிலையத்தில் முறையிடப்பட்டுள்ளபோதிலும் இது தொடர்பில் எந்தவித நடவடிக்கையும் எடுக்கப்படுவதில்லையெனவும் இதற்கு அதாவுல்லாவின் அரசியல் தான் காரணம் எனவும் தெரிவிக்கப்பட்டுள்ளது. தமிழ் மக்களை காக்கப்போகின்றோம் என பிரிந்துசென்று எமது உறவுகளை காட்டிக்கொடுத்து படுகொலைகளை புரிந்து இன்று எமது இனத்தை நடுத்தெருவில் தள்ளிவிட்டுள்ள துணை ஆயுதக்குழுக்கள் இது தொடர்பில் எதுவித நடவடிக்கையும் எடுக்காததையிட்டு இப்பகுதி மக்கள் கடும் அதிர்ப்தியில் உள்ளனர். இன்று எமக்கு முன்னாள் உள்ள பாரிய கடமையினை சிந்திக்கவேண்டிய தருணத்தில் நாம் உள்ளோம் என்பதையும் இப்பகுதியில் தமிழ் மக்களின் சுதந்திரம், உரிமை, பாதுகாப்பு என்பனவற்றை நிலை நாட்டவேண்டிய பாரியபொறுப்பு எமது கைகளிலேயே உள்ளது.

மீண்டும் புலிகளின் வரவை எதிர்பார்க்கும் தமிழீழ மக்கள்

நேற்று நடைபெற்ற எழாவது ஸ்ரீலங்கா பாராளுமன்ற தேர்தல் பல வன்முறைகள் மற்றும் முறைகேடுகள் மத்தியில் நடைபெற்று முடிந்துள்ளது. கிடைத்த தகவல்படி யாழ் தேர்தலில் சிறுவர்களை கூட வாக்கு போட வெத்திலை அழைத்து சென்று வாக்கு போட வைத்துள்ளதாம். அது ஒரு பக்கம் இருக்கட்டும் 18 வீதமான மக்கள் யாழ் தேர்தல் பகுதியில் வாக்குகளை வழங்கியதாக தெரிவிக்கப்படுகிறது இதில் வாக்களித்த தமிழர்கள் ஒன்று தமிழ்தேசிய கூட்டமைப்புக்கோ அல்லது தமிழ்தேசிய மக்கள் முன்னணிக்கோ வழங்கியிருக்கலாம் .வாக்களிக்காமல் இருந்த தமிழர்கள் இவர்கள் தமிழீழ விடுதலை புலிகள் தான் அவர்களுடை தீர்வு அவர்கள் கொள்கையே எமக்கு விடிவு ஸ்ரீலங்கா அரசியல் தமிழீழ மக்களுக்கு தீர்வு இல்லை எமக்கு எமது நாட்டில் எம்மை ஆளும் தனி தமிழீழமே தேவை அதை புலிப்படை வந்து பெற்று தரும் வரை தமிழீழமே எங்கள் வேட்கை அதற்க்காக எம் ஈழத்தில் ஒரு தேர்தல் வையுங்கள் தமிழீழ தனியரசு தேர்தல் அதற்க்காக நாங்கள் அளிப்போம் எங்கள் வாக்குகளே என்று உலக வல்லரசுகளுக்கு எடுத்துரைத்துள்ளனர் 82 % மேற்பட்ட தமிழர்கள் புறக்கணித்த தேர்தல் இது உலக நட்டு தலைவர்களுக்கு ஒரு செய்தி உணருங்கள் முக்கியமாக இந்திய தந்தை நாடே நீ புரிந்து கொள்ளு எங்கள் தீர்ப்பை.

கிர்கிஸ்தானில் எதிர்க்கட்சிகள் பெரும் புரட்சி

கிர்கிஸ்தானில் எதிர்க்கட்சிகள் பெரும் புரட்சி நடத்தி ஆட்சியைப் கைப்பற்றியதைத் தொடர்ந்து அந்நாட்டு ஜனாதிபதி குர்மான்பெக் பாகியேவ் நாட்டை விட்டுத் தப்பியோடியுள்ளார். நேற்று இடம்பெற்ற கலவரத்தில் 100 பேர் வரை பலியாகி இருக்கலாம் என்று தகவல்கள் தெரிவிக்கின்றன. முன்னாள் சோவியத் யூனியன் நாடான கிர்கிஸ்தானின் ஜனாதிபதியாக உள்ள பாகியேவ், சில ஆண்டுகளுக்கு முன்பு பல்வேறு கட்சிகளைத் திரட்டி அரசுக்கு எதிராகப் போராட்டம் நடத்தி ஆட்சியைக் கைப்பற்றியிருந்தார். தற்போது அவரது ஆட்சியும் அதே போன்ற ஒருபுரட்சி போராட்டத்தால் பறிபோயுள்ளது. நேற்றுக் காலை தலைநகர் பிஷ்கெக்கில் பெரும் கலவரம் வெடித்தது. பல ஆயிரக்கணக்கானோர் ஒன்று திரண்டு அரசு அலுவலகங்களை சூறையாடினர். நாடாளுமன்றம், அரசுக் கட்டிடங்கள், அலுவலகங்களை போராட்டக்காரர்கள் கைப்பற்றியுள்ளனர். பொலிஸார் நடத்திய கண்ணீர்ப் புகை வீச்சு மற்றும் துப்பாக்கிச் சூட்டில் 12 பேர் உயிரிழந்ததாகத் தகவல் கள் தெரிவிக்கின்றன. இந்தக் கலவரத்தில் கிர்கிஸ்தான் உள்துறை அமைச்சர் அடித்துக் கொல்லப்பட்டார். இதைத் தொடர்ந்து ஜனாதிபதி பாகியேவ் தப்பி ஓடி விட்டார். அவர் அண்டை நாடு ஒன்றுக்கு தப்பிச் சென்றிருக்கலாம் என்று தெரிகிறது. இதனிடையே தலைநகர் பிஷ்கெக் உட்பட நாடு முழுவதும் நடந்த கலவரத்தில் இதுவரை 100 பேர் இறந்துள்ளதாக தகவல்கள் கூறுகின்றன. அரசு கட்டடங்கள், தொலைக்காட்சி மற்றும் வானொலி உள்ளிட்டவை எதிர்க்கட்சியினரின் கட்டுப்பாட்டில் வந்துவிட்டதாகக் கூறப்படுகிறது. எதிர்க்கட்சிகளின் புரட்சிக்கு நாடு முழுவதும் மலிந்து விட்ட ஊழலே காரணம் என்று கூறப்பட்டாலும் ரஷ்யாதான் அரசுக்கு எதிராக கலகத்தை தூண்டி விட்டுள்ளதாக குற்றச்சாட்டு எழுந்துள்ளது. ஆனால், ரஷ்யா அதனை மறுத்துள்ளது.

பிரேசிலை உலுக்கும் பெருமழையும் நிலச்சரிவும்

வட அமெரிக்க கண்டத்தில் உள்ள பிரேசிலில் தொடர்ந்து பலத்த மழை பெய்து வருகிறது,இதனால் அங்குள்ள ஏரிகள் ,குளங்கள் அனைத்தும் பொங்கி வழிகின்றன. பலத்த மழையின் காரணமாக நிலச் சரிவும் ஏற்பட்டு ரோடுகள் அடித்துச் செல்லப்பட போக்குவரத்து வசதி துண்டிக்கப் பட்டது. மின்சார கம்பிகள் அறுந்து விழுந்ததால் மின் இணைப்பும் துண்டிக்கப்பட்டுள்ளது. 180 இடங்களில் ஏற்பட்ட நிலச்சரிவால் 10000 வீடுகள் மண்ணுக்குள் புதைந்தன.இந்த பெருமழையால் பிரேசிலின் கியோ டி ஜெனரியோ நகரம் தான் மிகுந்த பாதிப்புக்கு உள்ளானது. வெள்ளத்தால் 100 பேர் உயிரிழந்தனர்.50 ௦பேர் படுகாயமடைந்தனர்.ஏராளமானோர் காணாமல் போனார்கள்,காணாமல் போனவர்கள் என்ன ஆனார்கள் என்பதைக் குறித்த விவரங்கள் தெரியவில்லை.மீட்ப்புப்பணியில் காவல்துறையினரும் தீயணைப்புப் படையினரும் ஈடுபடுத்தப் பட்டுள்ளனர். கடந்த ஜனவரியிலும் இதே போன்றதொரு வெள்ளப்பெருக்கு பிரேசிலில் ஏற்பட்டது,அப்போது பிரேசிலின் ரியோ, சாபாலோ, மினாஸ் ஜெராய்ஸ் மாநிலங்கள் கடுமையாக பாதிக்கப்பட்டன. 76 பேர் பலியானார்கள் . கட்டிடங்கள் இடிந்து சேதமடைந்தன. ரியோவிலும் துறைமுக நகரமான சாந்தோசிலும் பலத்த பாதிப்பு ஏற்பட்டு அங்கு பலர் இறந்தனர். பிரேசிலில் வரும் 2014 ஆம் ஆண்டு உலக கால்பந்து போட்டியும் 2016 இல் ஒலிம்பிக் போட்டியும் நடைபெறப்போவதாக அறிவிக்கப்பட்டுள்ள நிலையில் இந்த பலத்த மழையும் ,நிலச்சரிவும் மக்களின் இயல்பு வாழ்க்கையைப் பாதித்திருப்பதோடு வரும் ஆண்டுகளில் அறிவிக்கப் பட்டபடி சர்வதேசப் போட்டிகள் அங்கு நடத்தப்படுமா எனும் சந்தேகத்தையும் எழுப்பியுள்ளது.போட்டிகளை ரத்து செய்வதா அல்லது தாமதப்படுத்தலாமா எனும் ஆலோசனையில் பிரேசில் அரசு தற்போது மூழ்கியுள்ளது.

அணு ஆயுத குறைப்பு புதிய ஒப்பந்தம்

உலகின் இரு பெரும் வல்லரசுகளான அமெரிக்காவும், ரஷ்யாவும் தங்களிடையே உள்ள அணு ஆயுதங்களின் எண்ணிக்கையை மேலும் 30 விழுக்காடு குறைத்துக் கொள்ளும் ஒப்பந்தத்தில் கையெழுத்திட்டுள்ளன. செக்கோஸ்லாவிய நாட்டின் அதிபர் மாளிகையில் நடந்த முக்கிய சந்திப்பில் அமெரிக்க அதிபர் பராக் ஒபாமாவும், இரஷ்ய அதிபர் திமித்ரி மெத்விடேவும் கையெழுத்திட்டனர். இந்த ஒப்பந்தம் இரு நாடுகளிடமும் தற்போது கைவசமுள்ள 2,200 அணு ஆயுதங்களில் 30 விழுக்காட்டைக் குறைத்து 1,550 என்ற அளவிற்கு வரும் 2012ஆம் ஆண்டிற்குள் குறைத்துக்கொள்ள வழிவகுக்கிறது. 1991ஆம் ஆண்டு அணு ஆயுதங்கள் குறைப்பு உடன்படிக்கையில் (Strategic Arms Reduction Treaty - START) அமெரிக்காவும் ரஷ்யாவும் கையெழுத்திட்டன. அதன் பயனாக இரு நாடுகளும் பல ஆயிரக்கணக்கில் தங்களிடையே குவித்து வைக்கப்பட்டிருந்த அணு ஆயுதங்களை செயலிழக்கச் செய்தன. அதில் பொருத்தப்பட்டிருந்த அணு வெடி பொருளை எடுத்து அணு மின் உலைகளில் பயன்படுத்த மற்ற நாடுகளுக்கு வழங்கின. அந்த 20 ஆண்டுக்கால ஒப்பந்தம் கடந்த டிசம்பரில் நிறைவு பெற்றதையடுத்து, அதற்கு மாற்றாக, அணு ஆயுதங்கள் குறைப்பு ஒப்பந்தம் என்ற ஒன்றை உருவாக்கி அதில் தற்போது இரு நாடுகளும் கையெழுத்திட்டுள்ளன. இந்த ஒப்பந்தத்தின் கீழ் அணு ஆயுதங்கள், நீண்ட தூர ஏவுகணைகள் ஆகியன செயலிழக்கச் செய்யப்படும். ஏவுகணை தடுப்பு ஏவுகணை பாதுகாப்புத் திட்டத்தின் கீழுள்ள அணு ஆயுத ஏவுகணைகள் இந்த ஒப்பந்தத்திற்கு உட்பட்டதல்ல என்று இரு நாடுகளும் ஒப்புக்கொண்டுள்ளன. ஒப்பந்தத்தில் கையெழுத்திட்டப் பிறகு பேசிய அமெரிக்க அதிபர் பராக் ஒபாமா, “ஒரு நீண்ட பயணத்திற்கான முதல் படி இது” என்று கூறியுள்ளார்.

அடுத்த நாடாளுமன்றம் தேர்தல்முறையை மாற்றுமா?

பொதுத்தேர்தலில் ஆளும்கட்சிக்கு மூன்றில் இரண்டு பெரும்பான்மை கிடைக்குமா என்ற கேள்வியே இப்போது பரவலாக எழுந்துள்ளது. மூன்றில் இரண்டு பெரும்பான்மைக்கு 150 ஆசனங்களைக் கைப்பற்ற வேண்டும். தற்போதைய நிலையில் 140 இடங்கள் கிடைப்பது உறுதி என்றும் மூன்றில் இரண்டு பெரும்பான்மை கிடைக்கும் என்று நம்புவதாகவும் கூறியிருக்கிறார் அமைச்சர் டலஸ் அழகப்பெரும. அதேவேளை, களனிப் பல்கலைக்கழகம் நடத்திய கருத்துக்கணிப்பு ஒன்றில் 145 இடங்கள் வரையே ஆளும்கட்சிக்கு கிடைக்கலாம் என்று கூறியுள்ளது. அதாவது ஆளும்கட்சிக்கு மூன்றில் இரண்டு பெரும்பான்மை கிடைப்பது ஒன்றும் அவ்வளவு சுலபமான காரியமாக இருக்கப்போவதில்லை. மூன்றில் இரண்டு பெரும்பான்மை பலம் கிடைத்தால் அரசியலமைப்பு திருத்தம் உள்ளிட்ட எதையும் செய்கின்ற அதிகாரம் ஆளும்கட்சிக்கு வந்து விடும். அது கடைக்காத பட்சத்தில் அரசியலமைப்பு திருத்தம் உள்ளிட்ட முக்கிய விடயங்களில் எதிர்க்கட்சி மீது பழியைப் போட்டுக்கொண்டு அரசாங்கம் செயற்படப்போவது உறுதி. அதேவேளை ஆளும்கட்சிக்கு மூன்றில் இரண்டு பெரும்பான்மை பலம் கிடைத்தாலும் சரி கிடைக்காவிட்டாலும் சரி ஒரு காரியம் மட்டும் விரைவில் நடைபெறப்போகிறது. அது தற்போதைய தேர்தல் முறை மாற்றியமைப்பதாகும். விகிதாசாரப் பிரதிநிதித்துவ தேர்தல் முறை குறித்து முன்னெப்போதும் இல்லாதளவுக்கு அதிருப்திகள் எழுந்துள்ளன. குறிப்பாக விருப்பு வாக்கு முறையினால் பிரதான கட்சிகள் உள்முரண்பாடுகளைத் தீர்த்துக்கொள்ள முடியாமல் தவிக்கின்றன. அதுமட்டுமன்றி இன்றைய நிலையில் தொகுதி வாரியான தேர்தல் முறை நடைமுறையில் இருக்குமேயானால் 1977ம் ஆணடு பொதுத்தேர்தலில் சிறிலங்கா சுதந்திரகட்சிக்கு ஏற்பட்டது போன்ற நிலைக்கு ஐதேகவை தள்ளிவிடலாம் என்று ஆளும்கட்சி நினைக்கிறது. விகிதாசாரப் பிரதிநிதித்துவம் காரணமாகவே சிறுபான்மையினர் அதிக பிரதிநிதித்துவத்தைப் பெறுவதாகவும் ஒரு கருத்து உள்ளது. இதுபோன்ற பல காரணங்களுக்காக விகிதாசாரப் பிரதிநிதித்துவ முறையை முற்றாக இல்லாதொழித்து மீளவும் தொகுதிவாரியான தேர்தல் முறையை நடைமுறைப்படுத்த அரசாங்கம் யோசிக்கிறது. தொகுதிவாரித் தேர்தல் முறையின் படி தற்போது 168 தேர்தல் தொகுதிகளே உள்ளன. ஆனால் நாடாளுமன்றத்தில் 225 உறுப்பினர்கள் உள்ளனர். எனவே எஞ்சியோரை எப்படித் தெரிவு செய்வது என்ற கேள்வி எழுகிறது. இதற்கு ஏற்கனவே பலரும் பல்வேறு ஆலோசனைகளைக் கூறியிருந்தனர். இரட்டைஅங்கத்தவர் தொகுதி முறை மூலமும் எஞ்சிய உறுப்பினர்களை விகிதாசாரப் பிரதிநிதித்துவ முறையின் கீழும் தெரிவு செய்யலாம் என்பது இந்த ஆலோசனைகளில் முக்கியமானது. அதாவது முற்றுமுழுதாக விகிதாசாரப் பிரதிநிதித்துவ முறையில் இருந்து இலங்கையினால் விலகிக் கொள்ள முடியாத நிலையே காணப்படுகிறது. விகிதாசாரப் பிரதிநிதித்துவமுறை மாற்றியமைக்கப்பட்டு தொகுதிவாரிப் பிரதிநிதித்துவ முறை அறிமுகப்படுத்தப்படும் போது நாடாளுமன்றத்தில் சிறுபான்மையினரின் பலம் குறைந்து போகும் வாய்ப்புகள் உள்ளன. சிறுபான்மையினரின் பிரதிநிதித்துவத்தை பாதுகாக்கவே மூதூர், பொத்துவில், நுவரெலியா போன்ற தொகுதிகள் பலவும் இரட்டை அங்கத்தவர் தொகுதிகளாக அறிவிக்கப்பட்டிருந்தன. ஆனால் அந்தமுறை மீளவும் ஏற்படுத்தப்படுமா என்பது முக்கியமான கேள்வியாக இருக்கும். முன்னரைப் போலன்றி இப்போது வேறும்பல தொகுதிகளில் சிறுபான்மையினரின் பலம் கேள்விக்குள்ளாக்கப்பட்டுள்ளது. இதனால் இரட்டை அங்கத்தவர் தொகுதிகளின் எண்ணிக்கையை அதிகரிக்க வேண்டியிருக்கும். இவையெல்லாம் தற்போதைய நிலையில் கருத்தில் கொள்ளப்படுமா என்பது தெரியவில்லை. இப்போதைக்கு ஆளும்கட்சிக்கு இருக்கின்ற ஒரே பிரச்சினை விகிதாசாரப் பிரதிநிதித்துவத்தை- குறிப்பாக விருப்புவாக்கு முறையை ஒழிப்பது தான். அது ஆளும்கட்சிக்கு தீராத தலைவலியாக உருவெடுத்துள்ளது. விருப்பு வாக்குகளுக்காக அதன் முக்கிய தலைவர்களே மோதிக் கொள்கிறார்கள். இந்தப் பிரச்சினையைச் சமாளிக்க முடியாமல் கட்சித் தலைமை தள்ளாடுகிறது. இதுபோல ஜதேக போன்ற ஏனைய கட்சிகளுக்கும் பிரச்சினைகள் இருக்கவே செய்கின்றன. ஏன் யாழ்ப்பாணத்தில் கூட ஆளும்கட்சிக் கூட்டணிக்குள் இந்தப் பிரச்சினை மோதல்களாக வெடித்திருக்கிறது. அரசாங்கம் தனது பக்கத்தில் உள்ள பிரச்சினைகளைத் தீர்க்க விரும்புகிறதே தவிர- சிறுபான்மையின மக்களின் நலன்களில் கவனம் செலுத்துமா என்பது சந்தேகமே. விகிதாசாரப் பிரதிநிதித்துவ முறையில் உள்ள மிகப்பெரிய குறைபாடு எந்தவொரு எம்.பியாவது மக்களுக்கு நேரடியாகப் பொறுப்புக் கூறவேண்டிய நிலையில் இல்லை என்பதே. அதாவது மாவட்ட அடிப்படையில் தெரிவு செய்யப்படும் எம்.பிக்கள் தமது பொறுப்புகளை தட்டிக் கழிப்பதற்கு இது வாய்ப்பாக அமைந்துள்ளது. தொகுதிவாரிப் பிரதிநிதித்துவ முறையில் தெரிவாகியிருந்தால் அந்தத் தொகுதி மக்கள் அந்தத் தொகுதி எம்.பிக்களிடம் தமது பிரச்சினைகளை முன்வைத்து தீர்வு காணமுடியும். ஆனால் விருப்புவாக்கு முறை அதற்கான வாய்ப்பை இல்லாது செய்துள்ளது. இன்னொரு பக்கத்தில் இப்போது வடக்கு-கிழக்கில் எங்கிருந்தோ எல்லாம் வேட்பாளர்கள் வந்து போட்டியிடுகிறார்கள். பெயர் ,ஊர் தெரியாதவர்கள் கூட விகிதாசாரப் பிரதிநிதித்துவ முறையில் போட்டியிடுகிறார்கள். ஏன் பிரதேசசபைத் தேர்தல்களில் இப்படியானவர்கள் தெரிவாகிக் கூட உள்ளனர். இதுபோன்ற நிலை தொடராமல் செய்வதற்கு மீளவும் தொகுதிவாரியான தேர்தல் முறை அவசியம் என்ற கருத்தும் உள்ளது. அடுத்த நாடாளுமன்றம் புதிய பல விடயங்களை சந்திக்கப் போகிறது. அதில் நிச்சயம் நடந்தேறப் போகும் நிகழ்வு விகிதாசாரப் பிரதிநிதித்துவ முறைக்கேற்ப விருப்பு வாக்குமுறைமை ஒழிக்கப்படும். இந்தத் தெரிவுமுறையை பிரதான கட்சிகள் வெறுப்பதனால் நிச்சயம் இந்த மாற்றம் நிகழும் என்பதில் சந்தேகம் இல்லை. ஆனால் இந்த மாற்றங்களின் போது சிறுபான்மையினரின் நலன்களைப் பாதுகாக்க நடவடிக்கை எடுக்கப்படுமா என்பது சந்தேகமே.

பொய்ப் பரப்புரையில் ஈடுபடும் தமிழ்வின் இணையத்தளம்

தமிழ்த் தேசியத்திற்காகக் குரல் கொடுக்கின்றோம் எனக்கூறும் “தமிழ்வின்” இணையத்தளம், கடந்த சில நாட்களாக தமிழ்த் தேசவிரோத நடவடிக்கையில் ஈடுபட்டு வருவதாக, தமிழ்த் தேசியத்திற்கான மக்கள் முன்னணியின் திருகோணமலை வேட்பாளர்கள் கண்டனம் வெளியிட்டுள்ளனர். பிலிப்பையா ஜோன்சன் தமிழரசுக் கட்சியின் ஆதரவாளர்களால் கத்திக் குத்துக்கு இலக்கான நிலையில், தமது அணிக்குள் பிளவு ஏற்பட்டுள்ளதாகவும், இதனாலேயே இந்த சம்பவம் இடம்பெற்றிருப்பதாகவும் தமிழ்வின் இணையத்தளம் பொய்ப்பரப்புரையை மேற்கொண்டு வருவதாக திருகோணமலை முதன்மை வேட்பாளர் சண்முகராஜா கெளரிமுகுந்தன், மற்றும் பிலிப்பையா ஜோன்சன் ஆகியோர் கூட்டாகக் கூறியுள்ளனர். தோ்தலில் போட்டியிடுவதில் இருந்து விலகி விட்டார்கள் என்பது உட்பட, இவ்வாறான பல பொய்ப் பரப்புரைகள் மேற்கொள்ளப்பட்ட போதிலும், அதனையும் மீறி தமிழ்த் தேசியத்திற்கான மக்கள் முன்னணிக்கு ஆதரவு பெருகி வருவதால், தமிழ்வின் இணையத்தளம் இவ்வாறான அடாவடித்தனமான பொய்ப் பரப்புரையைக் கட்டவிழ்த்து விட்டுள்ளது. உண்மையான ஊடக தர்மத்துடன் இந்த இணையத்தளம் இயங்கினால் இருவரிடமும் கருத்துக்கேட்டு அதனை உறுதி செய்திருக்க வேண்டும் என, இரண்டு வேட்பாளர்களும் கண்டனம் வெளியிட்டனர். கெளரிமுகுந்தனும், ஜோன்சனும் பிளவுபட்டுள்ளதாகக் கூறும் தமிழ்வின் இணையத்தளம், அவர்கள் இருவரும் மருத்துவமனையில் இணைந்திருக்கும் நிழற்படத்தை, தங்களுக்குத் தெரியாமலே வெளியிட்டுள்ளமைதான் மிகவும் நகைப்பிற்கிடமான விடயமாகும். தமிழ்வின், லங்காசிறி போன்ற இணையத்தளங்களின் உரிமையாளரான சுவிசில் வசிக்கும் சிறிகுகனின் சகோதரரான சிறீதரன் தமிழரசுக் கட்சியின் சார்பில் யாழ் மாவட்டத்தில் போட்டியிடுவதால், ஒருபக்க செய்திகளையும், இவ்வாறான விசமப் பரப்புரைகளையும் அந்த இணையத்தளம் மேற்கொண்டு வருவதாகக் கண்டனம் வெளியிடப்பட்டுள்ளது.

நெஞ்ச நிமித்துக் கொண்டு போகிறார்.

1995 ஆம் ஆண்டு ஆகஸ்டு வரை விடுதலைப்புலிகள் இருந்த காலத்தில் யாழ்ப்பாண வீதிகளில் எங்கும் யாரும் போகலாம் வரலாம். புலிகள் எந்தத் தடையும் போடவில்லை. காவலரணும் வைத்துக் காத்திருக்கவில்லை. ஆனால் 1995 இறுதியில் சூரியக் கதிர் இராணுவ நடவடிக்கை மூலம் யாழ்ப்பாணத்தைக் கைப்பற்றிய சிங்களப் படைகள் அங்கு பல மாற்றங்களை உண்டு பண்ணின. உயர் பாதுகாப்பு வலயங்களை நிறுவின. பாதைகளை மூடின. காவலரண்களை அமைத்துக் கண்காணித்தன. சோதனைச் சாவடிகளைத் திறந்தன. கண்ணிவெடி வயல்களை உருவாக்கின. மனிதப் புதைகுழிகளை நிறுவின. வதை முகாம்களை நிறுவின. காணிகளை சூறையாடின. வீடுகளை இடித்துத் தள்ளின. இப்படி என்னென்ன அடக்குமுறைகளை எல்லாம் செய்ய முடியுமோ அத்தனையையும் தங்கு தடையின்றி செய்து கொண்டே இருந்தனர் கடந்த 15 ஆண்டுகளாக. இதற்கு எல்லாம் ஒத்தூதிக் கொண்டு சிங்களத்தின் கால் பிடித்து பிழைப்பு நடத்தியவர் தான் இப்போ சிலரால் தமிழர்களின் தலைவராம் என்று சொல்லி யாழ்ப்பாணத்தில் நெஞ்சை நிமிர்த்திக் கொண்டு திரியுறாராம் தங்கள் தலைவர் என்று டக்கிளஸ் தேவானந்தா என்ற சிங்கள அருவடியை முன்னிறுத்தி வருகின்றனர். அவர்களின் தங்கத் தலைவர்.. கடந்த ஜனாதிபதி தேர்தலுக்கு முதல் நாள் தென்மராட்சி மக்களை மீளக் குடியேற்றுகிறேன் என்று கூட்டிப் போய் படம் எல்லாம் எடுத்து பேப்பரில போட்டார். ஆனால் இறுதியில் தலைவரின் முயற்சிகள் எதுவும் கைகூடாத நிலையில் மக்கள் ஏமாற்றத்தோடு திரும்பினர். இன்றோ.. தலைவர் தனது சிங்கள அருவருடிக் கூட்டத்திடம் கெஞ்சி மன்றாடி தாங்களே பூட்டி வைத்திருந்த யாழ்ப்பாண மணிக்கூட்டுக் கோபுரம் நோக்கிய பாதையை திறந்து வேடிக்கை காட்டுகிறார். யாருக்கு இவர்கள் பூச்சாண்டி காட்டுகின்றனர். இதே பாதையால் எந்த தங்கு தடையும் இன்றி 1994 இல் பிக் மச் (யாழ்ப்பாணத்தில் பாடசாலைகள் மத்தியில் நடக்கும் பிரபல கிரிக்கெட் போட்டி) போய் பார்த்தவன் என்ற முறையில்.. இந்தப் பேடிகளின் கூத்தை.. இதுதான் சமாதானம்.. சுதந்திரக் காற்று என்று மக்களுக்கு காட்ட விளையும் இந்தத் தெருக் கூத்துக்களை கண்ணுறும் போது.. வேதனை தான் மிஞ்சுகிறது. எங்கள் வீட்டில் வந்து நின்று கொண்டு எங்களுக்கே தடை போட்டுவிட்டு.. அந்தத் தடையை திறக்கிறம் என்றும் எங்களுக்கு விடிவளிக்கிறம் என்றும் வெளிக்கிட்டுள்ள இந்த விடிவெள்ளிகள்.. நெஞ்சை நிமிர்த்திக் கொண்டு போகவும் சிங்களப் படைகள் தான் சீருடையிலும் சிவிலிலும் காவலுக்குத் திரிகின்றன. இதுதான் யாழ்ப்பாணத்தார் 30 ஆண்டுகளின் பின் சுவாசிக்கும் சுதந்திரக் காற்றின் மகிமையாம். கேட்கிறவன் கேணயன் என்றால் எருமை மாடும் ஏரேபிளேன் ஓடுமாம் என்பது இதைத்தான்.

இந்திய இராணுவ ரகசியங்களை திருடியது சீனா!

இந்தியாவின் ஏவுகணை தொழில்நுட்பம் உள்ளிட்ட ராணுவ ரகசியங்களை சீனா திருடியுள்ளதாக தெரியவந்துள்ளது. இந்திய ஏவுகணையின் பழைய தொழில்நுட்பம் மட்டுமல்லாது சமீபத்தில் அறிமுகப்படுத்தப்பட்ட நடமாடும் வாகனத்தில் இருந்து செலுத்தப்படும் ஏவுகணை தொழில்நுட்பம் வரை அவர்கள் திருடிவிட்டார்கள் என்று அமெரிக்கா மற்றும் கனடாவைச் சேர்ந்து உளவு நிபுணர்கள் கூறி,​​ பரபரப்பை ஏற்படுத்தியுள்ளனர்.​ கனடாவின் டொரண்டோ பல்கலைக்கழகத்தில் பணியாற்றும் அமெரிக்க மற்றும் கனடா உளவு நிபுணர்கள்,​​ கணிப்பொறி மூலம் ஒரு நாட்டின் ரகசியங்களை பிற நாடுகள் திருடுவது குறித்து உளவு நடவடிக்கையில் ஈடுபட்டனர்.​ அவர்கள் கடந்த 6 மாதம் நடத்திய உளவு நடவடிக்கையில் இந்தியாவின் இராணுவ ரகசியங்களை சீனா திருடியது அம்பலமானது. இது குறித்து அவர்கள் வெளியிட்டுள்ள அறிக்கையில் மேலும் கூறியிருப்பது:​ இந்தியாவின் இராணுவ ரகசியங்களை மட்டுமல்லாது அந்நாட்டின் வெளிநாட்டு உறவு ரகசியங்களையும் சீனா திருடியுள்ளது.​ இந்த ரகசியத் தகவல்கள் அனைத்தையும் இந்தியாவின் பாதுகாப்பு அமைச்சக அலுவலகம்,​​ தேசிய பாதுகாப்பு கவுன்சில் செயலகம் மற்றும் உலகம் முழுவதும் இந்திய தூதரகங்களில் உள்ள கணிப்பொறியில் இருந்து திருடப்பட்டுள்ளன. அந்தவகையில் பெல்ஜியம்,​​ செர்பியா,​​ ஜெர்மனி,​​ இத்தாலி,​​ குவைத்,​​ அமெரிக்கா,​​ ஜிம்பாப்வே,​​ சைப்ரஸ்,​​ பிரிட்டன் ஆகிய நாடுகளின் இந்திய தூதரகங்களில் உள்ள கணிப்பொறிகளில் சேமித்து வைக்கப்பட்டிருந்த தகவல்கள் திருடப்பட்டுள்ளன. ஆப்கானிஸ்தானின் இந்திய தூதரக அலுவலகத்தில் விசாவுக்கு விண்ணப்பிக்கப்பட்டிருந்த தகவல்களும் திருடப்பட்டுள்ளன. நாகாலாந்து,​​ திரிபுரா,​​ மணிப்பூர்,​​ அசாம் ஆகிய மாநிலங்களில் பாதுகாப்பு சூழல் குறித்து ஆய்வு செய்து பாதுகாக்கப்பட்டுவந்த தகவல்கள் தேசிய பாதுகாப்பு கவுன்சில் செயலகத்தின் கணிப்பொறியில் இருந்து திருடப்பட்டுள்ளது. ஒரு நாட்டின் இராணுவ ரகசியங்களை பிற நாடுகள் திருடுவதென்பது எளிதான விஷயமல்ல.​ அதனால் பாதுகாப்பாக வைக்கப்பட்டிருந்த இந்திய இராணுவ ரகசியங்களை சீனா எப்படி திருடியது என்பது தெரியவில்லை.​ இதற்கு இந்தியர்களே உடந்தையாக இருந்தார்களா என்பதும் தெரியவில்லை.​​ தவிர,​​ இந்தியாவில் தஞ்சம் அடைந்துள்ள திபெத் புத்த மதத் தலைவர் தலாய் லாமாவின் அலுவலக கணிப்பொறியில் இருந்தும் ரகசியத் தகவல்களை சீனா திருடியுள்ளது.​ இந்த தகவல் எப்படி திருடப்பட்டது என்பதும் மர்மமாக உள்ளது.​ இதை கண்டறிய நாங்கள் பல்வேறு வழிகளில் தீவிரமாக முயற்சித்தோம்.​ ஆனால் எங்களால் இறுதிவரை கண்டறிய முடியவில்லை என்று அந்த அறிக்கையில் நிபுணர்கள் தெரிவித்துள்ளனர்.

மாவோயிஸ்ட் தாக்குதலில் 73 காவலர்கள் பலி!

சட்டீஸ்கர் மாநிலம் டாண்டேவாடாவில் இன்று காலை மாவோயிஸ்ட்கள் நடத்திய படு பயங்கரமான தாக்குதலில் மத்திய ரிசர்வ் பொலிஸ் படையைச் சேர்ந்த 73 காவலர்கள் பலியாயினர்.சடலங்களை மீட்க ஹெலிகொப்டர் அனுப்பப்பட்டுள்ளதாக அங்கிருந்து கிடைக்கும் செய்திகள் தெரிவிக்கின்றன. 120 பேர் கொண்ட சி.ஆர்.பி.எஃப். படையினர் இன்று காலை பாதை திறப்பு ஒன்றில் கலந்து கொண்டு திரும்பிக் கொண்டிருந்தனர். சிண்டல்னர், டர்மெட்லா ஆகிய பகுதிகளுக்கு இடையே வந்துகொண்டிருந்தபோது, முக்ரனா வனப்பகுதியில் இந்தத் தாக்குதல் நடத்தப்பட்டுள்ளது. சுமார் 1000 பேர் கொண்ட மாவோயிஸ்ட்கள் இத்தாக்குதலை நடத்தியதாகக் கூறப்படுகிறது.முதலில் காவல்படையினர் வந்த வாகனம் குண்டு வைத்துத் தகர்க்கப்பட்டுள்ளது. இதனையடுத்து திறந்த வெளியில் வந்த படையினர் மீது மாவோயிஸ்ட்கள் கண்மூடித்தனமாக துப்பாக்கிச் சூடு நடத்தினர். மேலும் 6 இடங்களில் மாவோயிஸ்ட்களுக்கும், காவல்துறையினருக்கும் சண்டை நடந்து வருவதாகவும் செய்திகள் வந்தவண்ணம் உள்ளன. மாநிலத்தின் உயர் காவலதிகாரிகள் தாக்குதல் நடந்த இடத்திற்கு விரைந்துள்ளனர்.இந்தத் தாக்குதலை காட்டுமிராண்டித்தனமானது என்று வர்ணித்துள்ள மத்திய உள்துறை அமைச்சர் ப.சிதம்பரம், தான் அதிர்ச்சியில் உறைந்திருப்பதாகத் தெரிவித்தார். மாவோயிஸ்ட்கள் நாட்டின் முதல் எதிரிகள் என்று உள்துறை அமைச்சர் ப.சிதம்பரம் நேற்று பேசியிருந்தார். இதையடுத்தே இவ்வாறான தாக்குதல்கள் இடம்பெற்று வருகின்றமை குறிப்பிடத்தக்கது.இதனிடையே பலி எண்ணிக்கை மேலும் அதிகரிக்கலாம் என்று அஞ்சப்படுகிறது.மேலும் அடர்ந்த வனப்பகுதி என்பதால் உடல்களை மீட்பதில் சிக்கல் ஏற்பட்டுள்ளதாகவும் கூறப்படுகின்றது

நாவலடி பிரதேசம் சிங்களவர்களின் குடியேற்ற பகுதியாக மாற இருக்கின்றது.

மட்டக்களப்பு மாநகர சபைக்கு உட்பட்ட உல்லாச பயணிகளால் கவர்ந்திழுக்கப்படும் தமிழர்களின் பூர்வீக பிரதேசமாக கருதப்படும் நாவலடி பிரதேசம் சிங்களவர்களின் குடியேற்ற பகுதியாக மாற இருக்கின்றது. 2004ம் ஆண்டு ஏற்பட்ட சுனாமி இயற்கை அனர்த்தத்தினால் முற்றாக பாதிக்கப்பட்ட பிரதேசங்களில் மட்டக்களப்பு நாவலடி பிரதேசமும் ஒன்று. இந்த பிரதேசத்தின் கிழக்கு பகுதியில் கடலும் மேற்கு பகுதியில் வாவியும் அமைந்துள்ளது குறிப்பிடத்தக்கது. 500 மீற்றருக்கும் குறைவான அகலம் கொண்டதாக இப்பிரதேசம் அமைந்துள்ளதால் இப்பிரதேசத்தில் சுனாமிக்கு பிறகு மக்கள் வசிப்பதற்கு அஞ்சியதாலும் கடற்கரைக்கு அண்டிய பிரதேசங்களில் குடியிருப்புக்களை அமைப்பதற்கு அரசு அங்கிகாரம் வழங்காமையாலும் இப்பிரதேச மக்கள் மட்டக்களப்பு மாநகர சபைக்குட்பட்ட பிறிதொரு பிரதேசமான திராய்மடு எனும் பிரதேசத்தில் குடியமர்த்தப்பட்டார்கள் இருந்தும் ஒரு சிலர் மாத்திரம் அங்கேயே குடியிருப்புக்களை அமைத்து தற்காலிகமான முறையில்தான் வசிக்கிறார்கள். இதேவேளை கடந்த வருடம் இப்பிரதேசத்தில் உல்லாச பயண விடுதிகளை அமைப்பதற்கு தகுதியானவர்களிடமிருந்து அரசினால் விண்ணப்பங்கள் கோரப்பட்டிருந்தது குறிப்பிடத்தக்கது. சுனாமி அனர்த்தம் ஏற்பட்டு 5 வருடங்கள் கடந்த நிலையில் மக்கள் அச்சம் இன்றி நாவலடி பிரதேசத்திற்கு வருகிறார்கள் பலபேர் அங்கேயே வசிக்கிறார்கள் இந்த நிலையில் தற்போது உல்லாச பயணிகளும் இங்கே வருவதற்கு தொடங்கி உள்ளார்கள். இதனால் சில தமிழ் தொழில் அதிபர்கள் தாங்களும் இங்கே உல்லாச பயண விடுதிகளை அமைப்பதற்கு அரசிடம் அனுமதி கோரி விண்ணப்பித்திருந்தார்கள் ஆனால் அவர்களின் அனுமதி மறுக்கப்பட்டது அதேவேளை பாரியளவிலான உல்லாச பயண விடுதிகளை சிங்களவர்களைக்கொண்டு அமைக்கவும் அதில் வேலை பார்ப்பதற்காக அதன் சுற்றுவட்டாரங்களில் சிங்கள குடியேற்றங்களையும் அவர்களை பாதுகாப்பதற்காக ஒரு கடற்படை தளத்தையும் அரசு அமைக்க திட்டமிட்டுள்ளதாக நம்பத்தகுந்த வட்டாரங்களினூடாக அறிய முடிகின்றது. இதன் முதற்கட்ட நடவடிக்கையாக இப்பிரதேசத்தின் நில அளவை படங்களை கச்சேரி ஊடாக அரசு கோரி இருக்கின்றது. இப்பிரதேசத்தில் பூர்வீகமாக வாழ்ந்த தமிழ்மக்கள் இனிவரும் காலங்களில் தங்களது பாரம்பரிய பிரதேசத்தையே பார்க்கமுடியாதவாறு அமையப்போகின்றது. மட்டக்களப்பு மாவட்டத்தின் மற்றுமொரு சுற்றுலா தளமாக விளங்குகின்ற பாசிக்குடா பிரதேசத்தின் பல பகுதிகளை ஏற்கனவே சிங்களவர்கள் (பசில் ராஜபட்ச உட்பட) சுவீகரித்து விட்டார்கள் என்பது குறிப்பிடத்தக்கது. வடக்கு கிழக்கு பிரதேசங்களின் எல்லை கிராமங்களில் அத்து மீறிய சிங்கள குடியேற்றங்களை திட்மிட்டு செயற்படுத்தி வருகின்ற ஸ்ரீ லங்கா அரசானது தற்போது கரையோர பிரதேசங்களிலும் அதை விஸ்தரித்து இன்னும் எங்கெல்லாம் பலாத்காரமாக தமிழர்களின் நிலங்களை அபகரிக்கப் போகின்றதோ தெரியாது

தமிழனின் குருதியை உடல் முழுக்க பூசி, உளவியல் ரீதியாக தம்மை அரக்கர்களாக பதிவு செய்து கொண்டார்கள்...........

பூமி உருண்டையானது. அது மாற்றங்களை நிகழ்த்திக்கொண்டே தாமும் இயங்கிக் கொண்டு, வரலாற்றையும் இயக்கிக் கொண்டிருக்கும் தன்மை வாய்ந்தது. இந்த இயக்கத்தில் பல்வேறு நிகழ்வுகள், அதிர்வுகளை ஏற்படுத்தி இருக்கலாம். சில நிகழ்வுகள் வியப்பை தந்திருக்கலாம். சில அச்சத்தையும், வேறு சில மகிழ்வையும் விளைவித்திருக்கலாம். இவை அனைத்தும் மாறி மாறி நிகழ வேண்டும் என்பது ஒரு நியதி. மாற்றங்களை யாராலும் தடுத்து நிறுத்த முடியாது. கால ஓட்டத்தில் அனைத்தும் கலந்து அடித்துச் செல்லப்படும். அவைகளின் திடமான பதிவுகள் வரலாறாய் நிலைத்து நிற்கும். அந்த அடிப்படையில்தான் பல்வேறு சம்பவங்கள் நமக்கு நினைவுகளாய் நிலைத்து விடுகின்றன. அவை நாம் விரும்பினாலும் மனங்களைவிட்டு அகன்று போகவில்லை. இது கால, சமூக கட்டமைப்பிற்கு ஏற்றவாறு மாந்தகுலம் ஏற்று, அனுபவித்துவரும் ஒரு இயக்கவியல் கோட்பாடு. இதிலிருந்து யாராலும் மீற முடியாது. இதிலிருந்து ஒருவரும் தப்பித்துச் செல்ல முடியாது.எந்த மனிதனும் இயந்திரத்தனமாக வாழ்வதற்கு காலம் அனுமதிப்பதில்லை. அழுகையும், சிரிப்பும், கவலையும், மகிழ்வும் கலந்து தான் காலம் நம்மை அழைத்துச் செல்கிறது. நாம் அழுத காலம் நிறைவு பெறத் தொடங்கிவிட்டது. நமது சிரிப்பின் காலம் தொடங்கிவிட்டது. நமது தேசிய தலைவரின் ஆழ்ந்த அரசியல் அறிவு, அதன் அடிப்படை நகர்வுகள் சிங்கள பேரினவாத பேயாட்டத்தின் தத்துவார்த்த தவறுகளை நன்கு அறிந்த காரணத்தால் நாம், நமது கருவிகளை களத்தில் அமர செய்துவிட்டு, அவர்களுக்குள்ளான கருவி ஏந்தலை கணித்துக் கொடுத்திருக்கிறோம். மகிந்தா அரசு தமது மமதையான செயல்பாட்டால் தமிழீழத்தின்மீது தொடுத்த கடுஞ்சமர் இன்று ஒரு எல்லைக்கு வந்துவிட்டது. எந்த ஒரு பயணமும் முடிவற்றதாக இருக்க முடியாது. எந்த ஒரு நிகழ்வும் தொடர்ந்து நிகழப்போவது கிடையாது. கால அளவில் எல்லாவற்றிற்கும் ஒரு எல்லை இருக்கிறது. மகிந்தாவின் கொடுஞ்செயலுக்கான எல்லை, மகிந்தாவாலேயே வகுக்கப்பட்டுவிட்டது. தாம் எந்த அளவையால் அளந்தோமோ அதே அளவையால் நமக்கும் அளக்கப்படும் என்கின்ற கோட்பாட்டியல் மகிந்தாவின் வாழ்வில் உண்மையாகிக் கொண்டிருக்கிறது. தமிழீழ வரலாற்றை பெரும் எழுச்சிக்கு உள்ளாக்கிய மகிந்தா, உள்ளபடியே நமது வாழ்த்துக்குரியவர். ஒருவேளை தமிழீழ வரலாற்றின் இந்த துயர், அத்தியாயம் படைக்கப்படாமல் இருந்தால், உலகலாவிய பெரும் ஒத்துழைப்பு நமக்கு இந்த அளவிற்கு கிடைப்பதற்கான வாய்ப்பு குறைந்திருக்கும். ஆனால் நமது சிந்தனை, தேசிய தலைவரின் வழிக்காட்டுதல், நாம் களமாடிய நேர்த்தி, நமது மாவீரர்களின் கனவு, நமக்கான தமிழ் தேசிய மண்ணை பெரும் வரலாற்று சிறப்போடு படைத்தளிக்க உறுதி அளித்திருக்கிறது. கடந்த காலங்களில் நாம், ஒன்றுப்பட்ட தேசிய இனம் என்று மிகவும் ஆர்ப்பாட்டத்தோடு அறிவித்து, தேசிய அரசியல் பேசிய மகிந்தாவின் பொய் முகம் கிழித்தெறியப்பட்டிருக்கிறது. மகிந்தாவிற்கெதிராக சிங்கள மக்கள் சிலிர்த்தெழுந்து களம்காண தொடங்கியிருக்கிறார்கள். ஒரு சர்வாதிகாரியை வீழ்த்த வேண்டும் என்பதிலே சிங்கள ஜனநாயக பண்பு கொண்ட மக்கள், ஒரே அணியாய் திரண்டிருக்கிறார்கள். அதன் அடையாளமாக கடந்த சில நாட்களுக்கு முன் ஜப்பானிலே மகிந்தாவை கண்டித்து சரத்தை விடுதலை செய்யக் கோரி, சிங்கள மக்கள் கோரிக்கை முழக்கம் செய்திருக்கிறார்கள். இது சிங்கள பேரினவாதி மகிந்தாவின் ஜனநாயக துரோகத்தை உலகநாடுகளில் அம்பலப்படுத்த பெரும் உதவிப் புரிந்தது. தமிழீழ மக்கள் ஒன்றிணைந்து மகிந்தா ஒரு போர் குற்றவாளி. தமிழீழ மக்கள்மீது மகிந்தா நடத்திய தாக்குதல் இன அழிப்பு நடவடிக்கை என்றெல்லாம் உயர முழங்கியபோது, அந்த குரல்களை முடமாக்கிய மகிந்தாவின் பணம், அரசியல் நிலைப்பாடுகள் இப்போது சிதறி சின்னாபின்னமாகிப் போய் கொண்டிருக்கிறது. இலங்கையிலே சரத்தை விடுதலை செய்யக்கோரி புத்தபிக்குகள் உண்ணாநிலை போராட்டத்தை முன்னெடுத்திருக்கிறார்கள். சரத்தை விடுதலை செய் என்று புத்த பிக்குகள் எடுத்த போராட்டத்தின் அடையாளம் மகிந்தா ஒரு கொடுங்கோலன், அடக்குமுறையாளன். அவனை எதிர்த்து யார் பேசினாலும் எழுதினாலும் அல்லது கருத்துக் கூறினாலும் அவர்களை சிறையில் அல்ல, சிரமே தறிக்க தயங்கமாட்டான் என்பதை புத்த பிக்குகளின் போராட்டம் உறுதிபடுத்தி இருக்கிறது. எந்த புத்தபிக்குகள் சிங்கள-பௌத்தத்தை உயர்த்திப்பிடித்து, சிங்கள-பௌத்த பேரினவாதத்தை தாங்கி, அதற்கு எதிரான நிகழ்வு நடந்தபோது, அன்பைப்பற்றி போதித்த, புத்தனின் வழி வந்தவர்கள், மனிதக்கறியை கரத்தில் ஏந்திய கொடுஞ்செயலை செய்து முடித்தவர்கள், தமிழனின் குருதியை உடல் முழுக்க பூசி, உளவியல் ரீதியாக தம்மை அரக்கர்களாக பதிவு செய்து கொண்டார்கள். அப்படி, சிங்கள பேரினவாதத்தின் அரணாக இருக்கக்கூடிய புத்த பிக்குகள், இன்று சிங்கள பேரினவாதத்திற்கு துணை நிற்கும் மகிந்தாவை எதிர்த்து களம் கண்டிருப்பது, இலங்கை-சிங்கள தேசிய அரசியல் வரலாற்றில் ஒரு புதிய திருப்புமுனையை உண்டாக்கப்போகிறது என்பதை நமக்கு தெரிவிக்கிறது. மகிந்தாவின் வீழ்ச்சி படிப்படியாய் தொடங்கிவிட்டதின் அடையாளம்தான் இன்று மகிந்தாவிற்கெதிராக சிங்கள மக்கள் தெருவுக்கு வந்து போராடத் தொடங்கியதை நாம் பார்த்துக் கொண்டிருக்கிறோம். மகிந்தா, சிங்கள பேரினவாதிகளை மட்டுமல்ல, தமிழின துரோகிகளை தமது பக்கத்தில் அமரச் செய்து, தமிழனை காயடிக்கும் அரசியலை செய்யப்புறப்பட்டு, அதற்கு எச்சில் துண்டுகளாக மந்திரி பதவிகளையும், பணத்தையும் வழங்கியதை வாலாட்டிக் கொண்டு, நாய் பிழைப்பு பிழைக்கும் இந்த நயவஞ்சக துரோகிகள், மகிந்தாவின் பக்கத்தில் சிரிக்க சிரிக்க நின்ற நிகழ்வுகள், இன்று தமிழ் மக்களால் நிராகரிக்கப்பட்டுக் கொண்டிருப்பதை நாம் செய்திகளில் பார்த்துக் கொண்டிருக்கிறோம். எமது தேசிய ராணுவம் தமிழீழ பகுதிக்குள் நிலைக்கொண்டிருந்தவரை, தமிழீழ பகுதிக்குள் எட்டிப் பார்க்கக்கூட அச்சம் கொண்டிருந்த மகிந்தா, இன்று எமது தேசிய ராணுவம் இல்லாத தைரியத்தில் தமிழீழ மக்களிடம் வாக்கு சேகரிக்க சென்று, மூக்கறுப்பட்டு திரும்பி இருக்கிறார். பெருமளவில் ஆள்திரட்டி மகிந்தாவை குளிர செய்யலாம் என தமிழின துரோகிகள் போட்ட திட்டம் தவிடுப்பொடியாகி இருக்கிறது. மேடையிலேயே கோபப்பட்டு வெளிப்படுத்திய மகிந்தா, தமது சரிவை உறுதி செய்திருக்கிறார். தோல்வி காண்பவர்களுக்கும், எதிர்சமர் புரிய அச்சப்படுபவர்களுக்கும் தான் கோபம் என்பது இயல்பான உணர்ச்சியாக வெளிப்படும். மகிந்தா, அச்சத்திலிருப்பதின் வெளிப்பாடுதான், மேடையின்மீது மகிந்தா பட்ட கோபம் என்பது நமக்கு தெளிவாகிறது. எமது பகுதிகளில் ஒரு பழமொழி சொல்வார்கள். முட்டாளுக்கு மூன்று இடத்தில் மலம் என. காலில் மிதித்த மலத்தை கழுவிக் கொள்ளாமல் அதை கையிலே தொட்டு, மூக்கிலேயும் முகர்ந்து பார்க்கும் போக்கைத்தான் இப்படி ஒரு பழமொழியாக சொல்வது வழக்கமாக இருந்து கொண்டிருக்கிறது. இந்த பழமொழி மகிந்தாவிற்கு மிகப் பொருத்தமாக இருக்கிறது. காரணம், தமிழீழ மக்களை கொன்றொழித்து, பெரும் வெற்றி கண்டதாக நினைத்து, தமிழ் பகுதிக்குச் சென்று மக்களின் சலனத்தை கண்டு எரிச்சலடைந்து, மேடையிலேயே மக்களை திட்டித்தீர்த்த அந்தப்போக்க, மகிந்தாவின் முட்டாள்தனத்தை தோலுரித்துக் காட்டுகின்றன. ஆக, எந்த ஒரு ஜனநாயகத்திற்கெதிரான மனிதனாக இருந்தாலும் அவன் நிச்சயமாக ஒருநாள் மாந்த குலத்தின் காலடியில் மண்டியிட்டேத் தீருவான் என்பதை நாம் ஒருபோதும் மறந்துவிடக் கூடாது. அப்படி ஜனநாயகத்தை சிதைத்து, மாந்த குலத்தை ஒழிக்க முனைந்த பல கொடுங்கோலர்கள் மக்களால் முறியடிக்கப்பட்டிருக்கிறார்கள் என்பதை வரலாறு நமக்கு சொல்லிக் கொடுத்திருக்கிறது. இப்போதும்கூட மகிந்தாவின் மமதை, மகிந்தாவின் வீழ்ச்சிக்கு அடையாளமாக, தொடர்ந்து நடைபெறும் நிகழ்வுகள் நமக்கு தெரிவிக்கும் அடிப்படை செய்தி என்னதென்றால், உலக வரலாற்றில் மாந்த குலத்திற்கெதிரான ஆற்றல்களை ஒடுக்கிய மக்களின் பேராற்றல், மகிந்தாவிற்கெதிராக திசை திரும்ப தொடங்கியிருக்கிறது. இது, நடைபெறும் தேர்தலில் வெளிப்படாமல் இருக்கலாம். ஆனால் நாளடைவில் இது நிச்சயமாய் பெரும் எழுச்சியாய் மாறப்போகிறது. இந்த எழுச்சியை முறியடிக்க எந்த ஆதிக்க ஆற்றலாலும் முடியாது. மகிந்தாவின் முடிவுரைக்கு தொடக்கமே மகிந்தாவின் செயல்களாக அடையாளப்படுத்துகின்றன.