பிரபாகரன் கொல்லப்பட்டதாக கூறப்படும் இடத்தில் இராணுவம் வெற்றிச் சின்னம்!

தமிழீழ விடுதலைப்புலிகள் தலைவர் வேலுப்பிள்ளை பிரபாகரன் அவர்கள் கொல்லப்பட்டதாக கூறப்படும் இடத்தில் சிங்கள இராணுவம் வெற்றிச் சின்னம் அமைத்து வருகிறதாக தெரியவந்துள்ளது. இலங்கையில் விடுதலைப் புலிகள் உடனான போர் கடந்த ஆண்டு மே மாதம் முடிவடைந்தது. அப்போது நடந்த சண்டையில், விடுதலைப் புலிகள் தலைவர் பிரபாகரன் கொல்லப்பட்டதாக இலங்கை அரசு அறிவித்தது. பிரபாகரன் உடல், முல்லைத்தீவு மாவட்டம், நந்திக் கடல் ஏரிப்பகுதியில் கண்டெடுக்கப்பட்டதாக இலங்கை அரசு தரப்பில் கூறப்பட்டது. இந் நிலையில், விடுதலைப் புலிகளுடனான போரில் வெற்றி பெற்றதன் அடையாளமாக, பிரபாகரன் கொல்லப்பட்ட நந்திக் கடல் ஏரி அருகே இலங்கை இராணுவம் வெற்றிச் சின்னம் அமைத்து வருகிறது. இதற்கிடையே, இறுதிக் கட்ட போர் நடைபெற்ற புதுக்குடியிருப்பு, விஸ்வமடு, புதுமாத்தளன் ஆகிய பகுதிகளில் கண்ணி வெடிகளை அகற்றும் பணி இன்னும் முடிவடையவில்லை. இதனால் அப்பகுதிகளில், தமிழர்கள் யாரும் குடியேற்றம் செய்யப்படாமல் வெறிச்சோடி போய்க் கிடக்கின்றன. அதே சமயத்தில், முல்லைத்தீவு கடலோரக் கிராமங்களில் வேறு பகுதிகளை சேர்ந்த சிங்கள மீனவர்களை குடியேற்றுவது குறித்து இலங்கை அரசு பரிசீலித்து வருவதாக தெரிவிக்கப்படுகிறது.

அயர்லாந்து, டப்ளினில் "எனது மகள் பயங்கரவாதி" திரைப்படம் ஒளிபரப்பு

அயர்லாந்து தலைநகர் டப்ளினில் மகளிர் தினத்தை முன்னிட்டு ஞாயிற்றுக்கிழமை மாலை எனது மகள் பயங்கரவாதி (My Daughter the Terrorist) எனும் திரைப்படம் அரங்கம் நிறைந்த காட்சியாக காண்பிக்கப்பட்டது. நோர்வே படத் தயாரிப்பாளரான பீட்டி ஆர்னஸ்ட் ( Beate Arnestad) அவர்களால் தயாரிக்கப்பட்ட இத்திரைப்படமானது தமிழீழ விடுதலைப் புலிகளின் பெண் புலிப் போராளிகளின் வாழ்க்கை மற்றும் கொள்கையை ஆவணப்படுத்தியதாக தயாரிக்கப்பட்டுள்ளது. இத்திரைப்படத்தை காண்பிக்கும் முன்னர் இந் நிகழ்ச்சியின் ஒருங்கமைப்பாளர் அங்கு வந்த பல்லின மக்களுக்கும் இலங்கை சுதந்திரம் அடைந்ததில் இருந்து இன்று வரை இலங்கையில் தமிழர்கள் எவ்வாறு சிங்கள பேரினவாத அரசினால் அடிமைப்படுத்தப்பட்டார்கள் என்பதனையும், எவ்வாறு தமிழர்களின் ஆரம்பகால அகிம்சைப் போராட்டம் வன்முறையால் அடக்கி ஒடுக்கப்பட்டது என்பதனையும், பின்னர் எவ்வாறு ஆயுதப் போராட்டம் ஆரம்பித்தது என்பதனையும், இலங்கை அரசாங்கத்திற்கும் தமிழீழ விடுதலைப் புலிகளிற்கும் இடையில் கைச்சாத்திடப்பட்ட சமாதான ஒப்பந்தம் எவ்வாறு சர்வதேச காரணிகளினால் முறிவடைந்தது என்பதனையும், இறுதிக்கட்டப் போரில் எவ்வாறு தமிழின அழிப்பு மேற்கொள்ளப்பட்டது என்பதனையும் தெளிவாக எடுத்துக் கூறினார். அதனைத் தொடர்ந்து இத் திரைப்படம் காண்பிக்கப்பட்டது. இத்திரைப்படக் காட்சிக்கு பல்லின மக்களும் வயது வேறுபாடு இன்றி கலந்து கொண்டனர்.

சந்திக்க துடிக்கும் மன்மோகன்: போக்குக் காட்டும் மகிந்த

அம்பாந்தோட்டை துறைமுக விரிவாக்கம் இந்திய நலனுக்கு எதிரான அச்சுறுத்தலாகவே அனைவராலும் கருதப்படுகிறது. இலங்கைக்கு சீனா சமீபத்தில் செய்த நவீன ஆயுத தளபாட அன்பளிப்பு இந்திய ராணுவ மற்றும் அரசியல் மட்டத்தில் பெரும் அதிர்ச்சியையும் ஏற்ப்படுத்தியுள்ளது. இன்னும் வரும் நாட்களில் அதிகரிக்கப்பட விருக்கும் சீன ஆயுத விரிவாக்கம் இந்தியாவிர்க்கேதிரான ஆயுத களஞ்சியமாகவே மேற்குலக ஊடகங்களால் கருத்து வெளியிடப் பட்டுள்ளன. தமிழ் மக்களுக்கு இந்தியா ஒரு தீர்வை ஏற்ப்படுத்திக் கொடுப்பது தவிர்க்க முடியாத ஒன்றாக சர்வதேச சமூகத்தால் உணரப்படும் பட்சத்தில் இந்தியா இவ்விடயத்தில் மெத்தனப் போக்கை கடை பிடிக்கும் பட்சத்தில் இந்தியாவையும் மீறிய சர்வதேசத்தின் தலையீடு ஒன்று ஏற்ப்படுவதை இந்தியா என்றுமே விரும்பாத ஒன்றாகும். எல்லாவற்றையும் விட நாடு கடந்த தமிழ்ழீழ அரசிட்க்கான உலக ஆதரவு பெருகி வருவதே இந்தியாவின் இரண்டு பெரிய கவலைகளில் ஒன்றாக கருதப்படுகிறது. மேற்குலகின் சீற்றத்தை தணிப்பதற்கு ஆலோசனை வேண்டி சென்ற வாரம் இந்தியா சென்றிருந்த கோத்தபாயவிற்கு ஊடகங்களிடம் பகைத்துக் கொள்ள வேண்டாம் என்றும் ராஜதந்திர உறவுகளில் மென்மேலும் அது விரிசலை உண்டு பண்ணவே வழி வகுக்கும் என்றும் நிருபமா ராவ் மூலமாக அறிவுறுத்தப் பட்டுள்ளது. போர்க்குற்றம், மனித உரிமை மீறல்களில் இருந்து காத்துக் கொள்ள நடைமுறையில் சில தளர்வுகளை உண்டுபண்ணி இந்திய கொள்கை வகுப்பாளர்களின் அறிவுறுத்தல்படி (சொல்படி) நடக்குமாறும் அறிவுறுத்தப்பட்டுள்ளார். இந்திய புலனாய்வு(RAW) கட்டமைப்பில் ஈழ விவகாரத்திற்க்கென இம்முறை புதிய அழகு ஒன்று ஏற்ப்படுத்தப் பட்டு அதன் பணி விரிவாக்கத்திற்காக முன்பைவிட பல்லாயிரக் கணக்கான கோடி ரூபாய் இம்முறை ராணுவ பட்ஜெட்டில் ஒதுக்கீடு செய்யப் பட்டுள்ளது. இவ்விடயத்தில் மனமோஹனை உடனடியாக மகிந்த சந்திக்குமாறும் சொல்லப்பட்டிருந்தது. ஆனால் இந்தியாவின் இத்தகைய முண்டு கொடுப்புக்களை மகிந்த அலட்சியம் செய்து போக்குக் காட்டி வருவதாக குற்றச் சாட்டுக்கள் எழுந்த வண்ணம் உள்ளன. அதன் பெறுபேறாகவே அதன் பின்னணியை ஆராய நிருபமாராவ் இலங்கைக்கு விஜயம் மேற்கொண்டு மஹிந்டவிட்க்கு மீண்டும் ஒரு அழைப்பை விடுத்துச் சென்றுள்ளதாக தெரிய வருகிறது.

மிகவும் சக்திவாய்ந்த புலம்பெயர் தமிழ் சமூகம் மேற்குலகத்தின் அசைவுகளை கட்டுப்படுத்துகின்றது: கோத்தபாய

விடுதலைப்புலிகளுக்கு ஆதரவாக நிதி வசதியில் முன்னிலையில் உள்ள சக்திவாய்ந்த புலம்பெயர் தமிழ் சமூகம் மேற்குலகத்தின் நடவடிக்கைகளில் முக்கிய பங்கு வகிக்கின்றன என இலங்கையின் பாதுகாப்புச் செயலாளரும், ஜனாதிபதியின் சகோதரருமான கோத்தபாய ராஜபக்ச இந்தியாவில் இருந்து வெளிவரும் தெல்கா சஞ்சிகைக்கு வழங்கிய நேர்காணலில் தெரிவித்துள்ளார். அதன் முழு வடிவம் வருமாறு: கேள்வி: குறிப்பாக எந்த குற்றச்சாட்டுக்களின் அடிப்படையில் அரசு பொன்சேகாவை கைது செய்துள்ளது? பதில்: அவருக்கு எதிரான குற்றச்சாட்டுக்களை என்னால் கூறமுடியாது, ஏனெனில் அது தொடர்பான பட்டியல் இராணுவத்தரப்பால் தயாரிக்கப்படுகின்றது. அவர்கள் அதற்கான விதிகளை பின்பற்றி வருகின்றனர். அது சட்டவாளர்களின் பணி. கேள்வி: அதாவது அவருக்கு எதிராக குறிப்பிடத்தக்க குற்றச்சாட்டுக்கள் இல்லை எனில் இது ஒரு தனிப்பட்ட நடவடிக்கை என அமையாதா? பதில்: இல்லை, சேவையில் இருந்தபோது எமது இராணுவத்திற்கு பொன்சேகாவினால் மேற்கொள்ளப்பட்ட சேதம் குறித்து பெரும்பாலான மக்களுக்கு தெரியாது. அதன் மூலமே அவர் அரசியலில் பிரவேசித்துள்ளார். கேள்வி: அவர் அரசியலை விட்டு விலகியிருக்க வேண்டுமா? நீங்கள் கூறும் சேதம் என்ன? பதில்: ஜனநாயகத்தில் அவருக்கும் உரிமை உண்டு. ஆனால் அவர் தனது பதவியை தவறாக பயன்படுத்தியுள்ளார். மூன்று சம்பவங்கள் அவரின் இந்த செயற்பாடுகளை மறைத்துள்ளன. அதாவது, அவர் போரை வழிநடத்தியவர், இரண்டாவது அவர் இராணுவத்தளபதியாக பதவி வகித்தவர், மூன்றாவது அவர் ஜனாதிபதி தேர்தலில் மகிந்தவை எதிர்த்து போட்டியிட்டதனால் கைது செய்யப்பட்டுள்ளார் என்பவை தான் அவை. ஆனால் உண்மை என்னவெனில் இராணுவத்தை அரசியல் மயப்படுத்தி அதனை அவர் சீரழித்துள்ளார். நாம் இந்தியாவின் காலாச்சாரத்தை பேணுவதில் பெருமை கொள்கிறோம், அங்கு இராணுவம் நடுநிலமை கொண்டது. ஆனால் அந்த நடைமுறை பொன்சேகாவினால் மீறப்படும் போது நடவடிக்கை எடுப்பதை தவிர வேறு வழிகள் இருக்கவில்லை. கேள்வி: ஒரு போர் வீரனாக, அவருக்கு பல ஆதரவுகள் உள்ளன, அவை தான் அவரை போட்டியிட தூண்டின இல்லையா? பதில்: அவர் இராணுவத்தில் இருந்து உரியமுறையில் விலகி, அரசியலில் பிரவேசித்திருக்கலாம். ஆனால் அவர் அதிகார ஆசைக்காக தனது பதவியை பயன்படுத்தி அவருக்கு தேவையான தொடர்புகளை ஏற்படுத்தியிருந்தார். பாதுகாப்பு பிரிவின் பிரதம அதிகாரியாக இருந்தபோதும், இராணுவத்தளபதியாக இருந்தபோதும் அவர் அதனை மேற்கொண்டுள்ளார். அவர் தனது விடுதியை அரசியல் பணிகளுக்கும், இராணுவத்தின் வளங்களை அரசியல் தேவைகளுக்கும் பயன்படுத்தியிருந்தார். கேள்வி: எந்த வகையான அரசியல் செயற்பாடுகள்? ஏன் அவர் அப்போது கைது செய்யப்படவில்லை? பதில்: அவர் படைகளின் பிரதம அதிகாரியாக இருந்தபோது தளபதிகளுடனும், மூத்த அதிகாரிகளுடனும் கலந்துரையாடல்களை மேற்கொண்டிருந்தார். தனக்குரிய பணிகளை மேற்கொள்ளுமாறு அவர் படையினரை கேட்டிருந்ததாக முறைப்பாடுகள் உண்டு. நாம் இது தொடர்பில் நடவடிக்கை எடுக்காது விட்டால் அது இராணுவத்தினருக்கு ஒரு தவறான வழிகாட்டலாக அமைந்துவிடும். ஒரு நடுநிலையான இராணுவத்தை பேணுவது எமது கடமை. இந்தியாவும் அவ்வாறே பேணிவருகின்றது. அல்லது அது அழிவடைந்துவிடும். கேள்வி: படை சிப்பாய்களை தவறாக பயன்படுத்தினார் பொன்சேகா என தெரிவித்திருந்தீர்கள் அது தொடர்பில் மேலதிக தகவல்களை தர முடியுமா? பதில்: இளம் படையினரும், தரநிலை குறைந்த இராணுவச் சிப்பாய்களும் வீதித்தடைகளில் நிறுத்தப்படும் வாகனங்களில் உள்ள மக்களிடம் பொன்சேகாவுக்கு வாக்களிக்குமாறு கோரிக்கைகளை விடுத்திருந்தனர். இராணுவத்தின் முன்னாள் தளபதி தேர்தலில் போட்டியிட்டதால் பெருமளவான படையினர் குழப்பமடைந்திருந்தனர். இராணுவத்தில் இருந்து தப்பியோடியவர்களிடமும் ஆதரவுகளை பெற அவர் முனைந்திருந்தார். அவர்களுக்கு அடைக்கலமும் வழங்கியிருந்தார். இராணுவத்தினரிடையே ஆய்வுகளை மேற்கொண்டு தேர்தல் வெற்றி தோல்வி தொடர்பில் கருத்துக்களையும் அவர் திரட்டியிருந்தார். அவர் தளபதியாக இருந்த போதும் அதனை மேற்கொண்டிருந்தார். அதனை நாம் அறிந்த போது, அதில் ஈடுபட்ட 15 மூத்த அதிகாரிகளை கட்டாய ஓய்வில் அனுப்பியிருந்தோம். கேள்வி: பொன்சேகா இராணுவப்புரட்சிக்கு முயன்றதாக, அரச தலைவரை படுகொலை செய்ய முயன்றதாக வேறு ஏதாவது முக்கிய குற்றச்சாட்டுக்கள் உண்டா? பதில்: நல்லது, அவை சிவில் சட்டங்களுக்கு மாற்றப்பட்டுள்ளன. அது தொடர்பில் குற்றப்புலனாய்த்துறையினர் விசாரணைகளை மேற்கொண்டு வருகின்றனர். அது வேறுபட்ட நடைமுறை. ஆனால் அவர் கைது செய்யப்பட்டது, அவர் பதவியில் இருந்த போது மேற்கொள்ளப்பட்ட குற்றங்களுக்காக. கேள்வி: மேற்குலக ஊடகங்களும், மனித உரிமை அமைப்புக்களும் பொன்சேகாவின் கைது ஒரு பழிவாங்கும் நடவடிக்கை என தெரிவித்து வருகின்றனவே? பதில்: நான் ஒன்றை தெரிந்துகொள்ள விரும்புகிறேன், அதாவது தான் அரச தலைவராக பதவியேற்றதும் மகிந்த ராஜபக்சவை சிறையில் அடைக்கப்போவதாக பொன்சேகா வெளிப்படையாக தெரிவித்தது தொடர்பில் ஏன் இவர்கள் கருத்து தெரிவிப்பதில்லை. கேள்வி: இராணுவத்தில் உள்ளபோது பொன்சேகா ஊழலில் ஈடுபட்டதாக குற்றச்சாட்டுக்கள் உள்ளன. அதனை அவர் தனது மருமகன் ஊடாக மேற்கொண்டிருந்தார், ஆனால் அவர் ஏன் அன்று கைது செய்யப்படவில்லை? பதில்: அது தொடர்பான விபரங்களை நாம் தற்போதே அறிந்துள்ளோம். அதனை சந்தேகநபர்கள் தெரிவித்து வருகின்றனர். கேள்வி: தமிழ் மக்களின் பிரச்சனைகளுக்கு ஒரு விரைவான தீர்வு முன்வைக்க வேண்டும், போர் குற்றங்கள் தொடர்பில் விசாரணைகள் மேற்கொள்ளப்பட வேண்டும், இடம்பெயர்ந்த மக்கள் விரைவாக மீள்குடியமர்த்தப்பட வேண்டும் என தெரிவித்ததால் தான் அவர் தண்டிக்கப்பட்டதாக பொன்சேகாவின் ஆதரவாளர்கள் தெரிவித்து வருகின்றனர்? பதில்: பெரும்பாலான ஊடகவியலாளர்கள் அதிக பயிற்சிகளை பெறவேண்டும் என நன் விரும்புகிறேன். போர் முடிந்த பின்னர் அவர் இராணுவ உடையில் இருந்தபோது மேற்கொண்ட பேச்சுக்களை ஏன் நீங்கள் ஆராயவில்லை? அதன் பின்னர் அவர் வேட்பாளரான போதும் அவ்வாறு பேசியிருந்தார். அதாவது அரசியல் தலைவர்கள் அரசியல் தீர்வை முன்வைப்பதற்காக படையினர் இரத்தம் சிந்தவில்லை என அவர் தெரிவித்திருந்தார். நாம் அதனை அனுமதிக்கவில்லை. இது இராணுவத்தை அரசியல் நடைமுறைகளுக்கு எதிரகக திருப்பும் திட்டமாகும். கேள்வி: வெள்ளைக்கொடிகளுடன் சரணடைந்த விடுதலைப்புலிகளை உங்களின் உத்தரவுகளை தொடர்ந்தே படையினர் படுகொலை செய்துள்ளதாக அவர் தெரிவித்துள்ளது தொடர்பில் என்ன தெரிவிக்க விரும்புகிறீர்கள்? பதில்: விடுதலைப்புலிகளின் அரசியல் தலைமைப்பீடம் சரணடைய முற்பட்டது, அவர்களின் நலன்களை பாதுகாப்பதற்கே என போரின் பின்னர் பொன்சேகா தெரிவித்திருந்தார். ஆனால் தற்போது அவர் மறுதலையாக பேசுகின்றார். அரசியல் தீர்வு தொடர்பில் பேசுகிறார், வெள்ளைக் கொடிகளுடன் வந்தவர்களை நான் படுகொலை செய்ய உத்தரவிட்டதாக தெரிவிக்கிறார். கேள்வி: ஆனால் உண்மையில் என்ன அங்கு நடைபெற்றது? பதில்: மே 18 ஆம் நாள் வேலுப்பிள்ளை பிரபாகரன் கொல்லப்பட்டார், அன்றைய தினம் விடுதலைப்புலிகளின் 200 தலைவர்கள் 400 சதுர கி. மீற்றர் பரப்பளவினுள் முடக்கப்பட்டனர். அவர்களை இராணுவம் சுற்றிவளைத்தது. அப்போது நள்ளிரவு நேரம். எனவே காட்டுப்பகுதியில் வெள்ளைக்கொடிகளுடன் வருபவர்களை அடையாளம் காண்பது கடினமானது. எனவே பலர் மீது தாக்குதல் மேற்கொள்ளப்பட்டது. வேலுப்பிள்ளை பிரபாகரன் நந்திக்கடல் ஊடாக தப்பிச் செல்ல முற்பட்டார். அவரின் மகன் எதிர்த்திசையில் செல்ல முற்பட்டார். 10,000 விடுதலைப்புலிகள் வேறு திசையால் சரணடைந்தனர். அது ஒரு கடுமையான சமர். இராணுவத்தில் புதிதாக இணைந்தவர்களால் விடுதலைப்புலிகளின் மூத்த தலைவர்களை இனம்காண முடியவில்லை. எனவே தான் அவர்கள் தாக்குதல்களை மேற்கொண்டிருந்தனர். கேள்வி: மேற்குலகம் தற்போதும் போர்க் குற்றங்கள் தொடர்பில் பேசி வருகின்றது. அது தொடர்பில் உங்களின் கருத்து என்ன? பதில்: எது போர்க்குற்றம் என்பது எமக்கு தெரியும். இராணுவ நடவடிக்கை என்ற போர்வையில் பழிவாங்கும் படுகொலைகள், கடத்தல்கள், கப்பம் பெறுதல் தான் அவை. அதற்காக நாம் படையினரை கைது செய்து நீதியின் முன் நிறுத்தி தண்டித்துள்ளோம். எனினும் எம்மால் கட்டுப்படுத்த முடியாத சந்தர்ப்பங்களும் உண்டு. உதாரணமாக, நாம் வைத்தியசாலைகள் மீது குண்டுகளை வீசியதாக அவர்கள் கூறுகின்றனர். அது வைத்தியசாலையாக அடையாளமிடப்பட்டிருந்தால் நாம் அதன் மீது குண்டு வீசினால் அது தவறு. ஆனால் நாம் அதனை மேற்கொள்ளவில்லை. இறுதிக்கட்ட போரில், விடுதலைப்புலிகள் சிறிய பகுதிக்குள் முடக்கப்பட்டிருந்தனர். எனவே வைத்தியசாலை மீது குண்டுகள் பாய்வதை தடுக்க முடியவில்லை. மேலும் இந்த நிலைமைகளில் அங்கு பொதுமக்களோ அல்லது நோயாளர்களோ இருக்கவில்லை. கேள்வி: மேற்குலகம் ஏன் பொன்சேகாவை ஆதரிக்கின்றன? பதில்: முதலாவதாக விடுதலைப்புலிகளுக்கு ஆதரவாக, நிதி வசதியில் முன்னிலையில் உள்ள சக்திவாய்ந்த புலம்பெயர் தமிழ் சமூகம் மேற்குலகத்தின் நடவடிக்கைகளில் முக்கிய பங்கு வகிக்கின்றன. அவர்கள் அரசியலிலும், ஊடகத்துறையிலும் அதிக பங்கு வகிக்கின்றனர். இரண்டாவதாக மேற்குலகத்தின் சில நகர்வுகளை இலங்கை எற்றுக்கொள்ளவில்லை. மூன்றாவதாக பொன்சேகாவை ஆதரிக்கும் ஐக்கிய தேசிய கட்சி அவர்களுக்கு அதிக ஆதரவுள்ளது என்பதால் மனித உரிமை அமைப்புக்கள் போர்க்குற்ற விசாரணைகளை முதன்மைப்படுத்தி வருகின்றன. கேள்வி: உங்களின் அரசு இடம்பெயர்ந்த தமிழ் மக்கள் தொடர்பில் மேற்கொண்டுவரும் நடவடிக்கைகளை பொன்சேகா விமர்சித்தது தொடர்பில்? பதில்: இடம்பெயர்ந்த மக்களின் விரைவான மீள்குடியேற்றத்தை ஜெனரல் பொன்சேகாவே பாதுகாப்புச் சபைக் கூட்டத்தில் எதிர்த்திருந்தார். அது பாதுகாப்புக்கு அச்சுறுத்தலானது என அவர் தெரிவித்திருந்தார். அதனால் தான் இடம்பெயர்ந்த மக்களின் மீள் குடியேற்றம் தாமதமாகியது. அவர் படைகளின் பிரதம அதிகாரியாக இருந்த போது மக்களை விடுவிப்பதற்கு எதிர்ப்புத் தெரிவித்திருந்தார். அதன் பின்னர் எதிர்க்கட்சிகளுடன் இணைந்து அரசை விமர்சித்துள்ளார். கேள்வி: இறுதியில் என்ன நடந்தது? பதில்: யாழ்ப்பாணம் மற்றும் கிழக்கு பகுதிகளை போல புதிதாக கைப்பற்றப்பட்ட பிரதேசங்களுக்கும் மக்கள் விரைவில் திரும்பிச் செல்ல அனுமதிக்கப்படுவது பாதுகாப்பானது என விரும்பினோம், ஆனால் பொன்சேகா அதனை மறுத்தார். அதன் பின்னர் அவர்களை தற்காலிக முகாம்களுக்கு அனுப்பிவைப்பது தொடர்பில் நான் கருத்து கூறினேன். ஆனால் அவர்களை முன்னைய முகாம்களுக்கு இழுத்துவருமாறு பொன்சேகா தெரிவித்திருந்தார். எமக்கு வேறு நாடுகள் மற்றும் ஐ.நா போன்றவற்றிடம் இருந்து அழுத்தங்கள் தரப்பட்டது. ஆனால் பொன்சேகா பாதுகாப்பு தொடர்பில் தொடர்ந்து வாதாடினார். அதன் பின்னர் அரச தலைவர் அதில் தலையிட்டார். என்ன பாதுகாப்பு தொடர்பாக நீங்கள் பேசுகின்றீர்கள்? என அவர் கேள்வி எழுப்பினார். ஏனெனில் 300,000 மக்கள் முகாம்களில் இருந்த போதே விடுதலைப்புலிகளின் ஆதரவாளர்கள் 20,000 பேர் தப்பிச் சென்றுவிட்டனர். எனவே பாதுகாப்பு என்பது எங்குள்ளது என அவர் கேள்வி எழுப்பினார். மக்களை உடனடியாக மீள்குடியமர்த்துமாறு அரச தலைவர் தெரிவித்தார்

இந்தியாவுக்கு எதிரான போரில் அம்பாந்தோட்டை துறைமுகம் சீன கடற்படையின் தளம் ஆகும்? - பிரித்தானிய ஏடு ஆராய்கிறது

வர்த்தக மற்றும் கடல்சார் உடன்பாடுகளை வேறு நாடுகளுடன் மேற்கொள்வதன் மூலம் தனது பழைய விரோதியாகிய இந்தியாவினைச் சுற்றி சீனா ஒரு வலையினைப் பின்னி வருகிறது. தந்திரோபாயமான ரீதியில் - கட்டுமானத் திட்டங்களையும் துறைமுக வசதிகளையும் மேம்படுத்தும் செயல் திட்டங்களை, இந்தியாவின் சொந்தக் கடற் பிராந்தியத்தில் சீனா ஏற்படுத்தி வருகின்றது. முன்னாள் அமெரிக்க அதிபர் புஷ் [George Bush] நிர்வாகம் ஆட்சியிலிருந்த காலப் பகுதியில் - இந்தியாவினைச் சுற்றி சீனா முன்னெடுக்கும் இவ்வாறான ஒவ்வொரு செயல் திட்டத்தினையும் ஒரு ‘முத்து’ என்றும், சீனா இந்த முத்துக்களைக் கோர்த்து ஒரு மூலோபாய வலைப் பின்னலை ஏற்படுத்த முனைகிறது என்றும் அமெரிக்க ஆய்வாளர்கள் விபரித்திருந்தனர். இது பின்னர் சீனாவின் ‘முத்துமாலை’ மூலோபாயம் - “string of pearls” என பலராலும் ஏற்றுக்கொள்ளப்பட்டது. “மறைமுகமான ஒரு தந்திரோபாயத்தின் ஒரு பகுதி தான் இந்த ‘முத்துமாலை முலோபாயம்’. இவ்வாறாக இந்தியாவினைச் சுற்றி சிலந்தி வலை போன்ற பலமான வலைப் பின்னலைப் பின்னுவதன் மூலம் - இரு நாடுகளுக்கும் இடையில் நெருக்கடி நிலை தோன்றுமிடத்து - இந்தியாவினை இந்த வலைக்குள் சிக்க வைப்பதை இலக்காகக் கொண்டதே இந்தத் தந்திரோபாயம்” என ஹொங்கொங்-இல் உள்ள Baptist University பல்கலைக்கழகத்தின் அரசியல் விஞ்ஞானப் பேராசிரியர் Jean-Pierre Cabestan தெரிவிக்கிறார். இவ்வாறு பிரித்தானியாவில் வெளியாகும் Guardian Weekly ஏட்டிற்காக Bruno Philip எழுதியுள்ள ஓர் ஆய்வில் குறிப்பி்ட்டுள்ளார். அதனைப் புதினப்பலகை-க்காகத் தமிழாக்கியவர் தி. வண்ணமதி. Bruno Philip மேலும் எழுதியுள்ளதாவது: துறைமுகங்களை மேம்படுத்தும் செயல் திட்டங்களை உள்ளடக்கிய இந்த முனைப்புக்கள் முழுமையான வர்த்தகம்-சார் இலக்குகளைக் கொண்டதே என சீனா வலியுறுத்தி வருகின்றது. இருப்பினும் - சீனாவிற்குத் தேவையான மசகு எண்ணெயினைப் பெற்றுக்கொள்வதற்கான பிரதான வழங்கல் பாதையாக இந்து சமுத்திரம் இருந்துவரும் நிலையில், தென்னாசியப் பிராந்தியத்தில் மோதல் நிலை தோன்றுமிடத்து - இந்தியாவினைச் சூழவுள்ள நாடுகளில் தான் விரிவாக்கம் செய்துவரும் துறைமுகங்களை சீனா தனது இராணுவத் தேவைக்குப் பயன்படுத்தலாம் என அவதானிகள் கருதுகிறார்கள். பாகிஸ்தானின் Baluchistan மாகாணத்திலுள்ள Gwadar என்ற இடத்தில் சீனாவின் நிதியுதவியுடன மேற்கொள்ளப்பட்டுவரும் துறைமுக நிர்மாணம் இந்தியாவிற்கு அதியுச்ச கரிசனையினை ஏற்படுத்தியிருக்கிறது. பர்மாவின் Sittwe, Mergui மற்றும் Dawei ஆகிய பிரதேசங்களில் இடம்பெற்றுவரும் துறைமுக நிர்மாணப் பணிகளிலும் பீஜிங் ஈடுபட்டிருக்கிறது. இவை தவிர - அம்பாந்தோட்டைத் துறைமுகத்தினை மும்முரமாக அபிவிருத்தி செய்துவரும் சீனா இலங்கையில் வேறு அதிக திட்டங்களையும் முன்னெடுத்து வருகிறது. இந்தத் துறைமுக அபிவிருத்திப் பணிகளுக்கான செலவில் 85 வீதமான பணத்தினை சீனாவின் Exim வங்கி வழங்கியிருக்கிறது. அண்ணளவாக ஒரு பில்லியன் டொலர் பெறுமதியான பணம் வழங்கப்பட்டிருக்கிறது. கடந்த வருடம் பிரிவினைவாத விடுதலைப் புலிகளை அழித்தொழிப்பதற்கான போருக்கும் சீனா தன்னாலான நிதியுதவியினை வழங்கியிருக்கிறது. பங்களாதேசின் சிட்டகொங் பிராந்தியத்தில் அமைந்திருக்கும் துறைமுகத்தினை ஆள்கடல் துறைமுகமாக நவீன மயப்படுத்துவதிலும் சீனா பங்களிப்பினைச் செய்திருக்கிறது. சீனாவின் ‘முத்துமாலை’ மூலோபாயத்தில் இறுதியாக இணைக்கப்பட்டிருக்கும் முத்தாக நேபாளம் மாறியிருக்கிது. இது நான்கு புறமும் தரையால் சூழப்பட்ட நாடாக இருந்தாலும் சீனாவைப் பொறுத்த வரையில் கேந்திர முக்கியத்துவம் வாய்ந்த இடத்தில் நேபாளம் அமைந்திருக்கிறது. 2008ம் ஆண்டில் நேபாளத்தின் அண்டை நாடான திபெத்தின் தலைநகர் Lhasa-வில் பிரச்சனைகள்ஏற்பட்ட பின்னர் - நேபாளம் திபெத்துடனான தனது எல்லைகளை இறுக்க வேண்டும் என்றும், நேபாளத்தில் பௌத்த துறவிகள் மேற்கொண்டு வரும் ஆர்ப்பாட்டங்களை அடக்க வேண்டும் என்றும் சீனா நேபாளத்திற்குத் தொடர் அழுத்தங்களைப் பிரயோகித்து வந்தது. கடந்த மாதம் நேபாளப் பிரதமர் Madhav Kumar Nepal பீஜிங்கிற்கான தனது விஜயமொன்றை மேற்கொண்டிருந்தார். சீன ஊடகங்களின் தகவலின் படி- இந்த விஜயமானது சீன-நேபாள எல்லைப் பாதுகாப்புத் தொடர்பான ஓர் உடன்பாடு எட்டப்படுவதற்கு வழிவகுத்திருக்கிறது. ஆனால், Chinese Global Times என்ற இணைய இதழில் கடந்த மாதம் எழுதப்பட்டிருந்த வெளியிடப்பட்டிருந்த தலையங்கம் - ‘இந்து சமுத்திரப் பிராந்தியத்தில் ஒரு மேலாண்மை நிலையினைப் பெறுவதற்குச் சீனா முனைகிறது என்ற அச்சம் இந்தியர்கள் மத்தியில் ஆழமாக ஏற்பட்டிருக்கிறது. ஆனால் இது போன்ற அச்சம் தேவையற்ற ஒன்றே. மத்திய கிழக்கு மற்றும் ஆபிரிக்காவிலிருந்து பெறப்படும் சீனாவிற்குத் தேவையான மசகு எண்ணெய் விநியோகங்கள் அனைத்தும் இந்து சமுத்திரத்தின் ஊடாகவே மேற்கொள்ளப்படுவதால் சீனா அந்த பிராந்தியத்தைக் கூர்ந்து அவதானித்து வருகிறது, அவ்வளவு தான்” என்று கூறுகின்றது. அப்படியானால் - ‘முத்துமாலை’ மூலோபாயத்தின் ஊடாக இந்து சமுத்திரப் பிராந்தியத்தில் இராணுவ ரீதியான அச்சுறுத்தலைச் சீனா ஏற்படுத்த முனைவதாகக் கூறப்படுவது வெறும் மிகைப்படுத்தப்பட்ட செய்தியா? “ஆபிரிக்காவிலோ அல்லது மத்திய கிழக்கிலோ ஓர் அவசரகால நிலைமை ஏற்படுமானால் - அங்கிருக்கும் தனது நாட்டு மக்களை மீட்கும் பணிகளுக்காகச் சீனக் கடற் படையின் தேவை எழுமெனில், மேலே குறிப்பிட்டவாறு இந்து சமுத்திரப் பிராந்திய நாடுகளில் சீனா அபிவிருத்தி செய்து வரும் துறைமுகங்கள் சீனக் கடற்படைக்கான பின்-தளங்களாகச் செயற்படும். எவ்வாறிருப்பினும் இந்தப் பிராந்தியத்தில் மோதல் நிலையொன்று தோன்றுமிடத்து நிலைமைகள் மிகவும் மோசமடைந்து காணப்படும்” எனப் பேராசிரியர் Jean-Pierre Cabestan தெரிவிக்கிறார். * இந்த கட்டுரையை எங்கும் மீள் பிரசுரம் செய்பவர்கள் - இது புதினப்பலகை இணையத் தளத்திற்காக தி. வண்ணமதி-யினால் தமிழாக்கம் செய்யப்பட்டது என்று குறிப்பிட்டுப் பிரசுரிக்கும்படி கேட்டுக்கொள்ளப்படுகின்றார்கள்.

தமிழ் நாட்டில் ஏற்படும் உணர்வுபூர்வமான செயற்பாடுகளை தடுப்பதற்காகவே நிருபாமா சிறீலங்கா வந்துள்ளார்

தமிழகத்தில் ஏற்பட்டு வரும் கருத்து மாற்றங்களை மழுங்கடிப்பதற்கே இந்திய வெளியுறவுச் செயலாளர் நிருபாமா ராவ் சிறீலங்கா வந்துள்ளதாக இடதுசாரி விடுதலை முன்னனியின் தலைவர் விக்கிரமபாகு கருணாரட்னா தெரிவித்துள்ளார். இது தொடர்பில் அவர் மேலும் தெரிவித்துள்ளதாவது: தமிழ் நாட்டில் ஏற்படும் உணர்வுபூர்வமான செயற்பாடுகளை தடுப்பதற்காகவே இந்திய வெளியுறவுச் செயலாளர் நிருபாமா ராவ் சிறீலங்காவுக்கு விஜயம் மேற்கொண்டுள்ளார். விடுதலைப்புலிகளுக்கு எதிரான போருக்கு இந்திய மத்திய அரசு முழுமையாக ஆதரவுகளை வழங்கியிருந்தது. ஆனால் அது தற்போது 13 ஆவது திருத்தச்சட்டங்களுக்கு அப்பால் ஒரு அரசியல் தீர்வுத்திட்டத்தை காண்பதற்கு முயன்று வருகின்றது. தமிழ் மக்களின் பிரச்சனைகள் தொடர்பில் தமிழகத் தலைவர்களிடம் ஏற்பட்டுவரும் மாற்றங்களை மழுங்கடிப்பதற்கே தற்போது இந்தியா முயன்று வருகின்றது. தமிழ் மக்களின் பிரச்சனைகள் தொடர்பில் இந்தியாவில் உள்ள இடதுசாரி கட்சிகளும் சிறீலங்காவுக்கு எதிரான கருத்துக்களை வெளியிட ஆரம்பித்துள்ளன. அவற்றை எல்லாம் மழுங்கடிப்பதற்கே இந்தியா தற்போது முயன்று வருகின்றது. அதற்காகவே நிருபாமா சிறீலங்கா வந்துள்ளார். அமெரிக்காவும், பிரித்தானியாவும் தற்போது முதலைக்கண்ணீர் வடிக்கின்றன. ஆனால் விடுதலைப்புலிகளை முறியடிப்பதற்கு அவர்கள் தான் சிறீலங்கா அரசுக்கு பணமும், ஆயுதங்களும் வழங்கியவர்கள். தற்போது அவர்கள் அரசியல் தீர்வு தொடர்பில் பேசி வருகின்றனர். சிங்கள இன கடும்போக்காளர்களை கொண்ட அரசிடம் இருந்து நாம் எவ்வாறு அதிகாரப்பகிர்வை எதிர்பார்க்க முடியும்? அவர்கள் தற்போது உள்ளுராட்சி சபைகளுக்கு எதனை வழங்கியுள்ளார்களோ அதனை தவிர நாம் எதனையும் அவர்களிடம் இருந்து பெறமுடியாது என அவர் மேலும் தெரிவித்துள்ளார்.

அதி உச்ச இனவெறி,,,

தமிழர் தாயகத்தில் நிறுவப்பட்டிருந்த மாவீரர் துயிலுமில்லங்களைச் சிதைக்கும் போக்கை சிறிலங்கா அரசும் அரசபடைகளும் நீண்டகாலமாகவே செய்து வருகின்றன. நடுகற்களையும் கல்லறைகளையும் இடித்தழிப்பதோடு நின்ற இச்செயற்பாடுகள் இப்போது இன்னும் உக்கிரம்பெற்று துயிலுமில்லங்களின் தடயங்களையே இல்லாதளவுக்கு அழிக்கும் நிலைக்கு முற்றியுள்ளது வன்னியில் மீளக் குடியமரச் சென்ற மக்களிடமிருந்து பெற்ற தகவல்களின் அடிப்படையில் வன்னிவிளாங்குள மாவீரர் துயிலுமில்லம் முற்றாக அழிக்கப்பட்டு உருத்தெரியாமல் மாற்றப்பட்டு வருகிறது. வன்னிவிளாங்குள – வவுனிக்குளப் பாதை சீரமைக்கப்பட்டு வரும் இவ்வேளையில் அப்பாதைக்கான கிரவல் மண் வன்னிவிளாங்குள மாவீரர் துயிலுமில்ல வளவிலிருந்தே அகழ்ந்து எடுக்கப்பட்டு பயன்படுத்தப்பட்டு வருகிறது. இராணுவத்தினரின் மேற்பார்வையோடு சிங்களத் தொழிலாளர்களைக் கொண்டு நடத்தப்படும் இவ்வேலைத்திட்டத்தில் வன்னிவிளாங்குள துயிலுமில்லப்பகுதி கனரகப் பொறிகளைக் கொண்டு ஆழத் தோண்டப்படுகிறது. அப்பகுதிக்கு நேரடியாகச் சென்ற தமிழ்மகன் ஒருவர் கதறியழுதபடி தனது உணர்ச்சிகளைப் பகிர்ந்துகொண்டார். உக்கிப் போகாமல் இருக்கும் வரிப்புலிச் சீருடைகளும் மாவீரர்களின் எலும்புக்கூடுகளும் கூட தோண்டியெடுக்கப்பட்டு ஒருபுறத்தில் போடப்படுகின்றன. மணலோடு மணலாகவும் அவை அள்ளிச்சென்று வீதியில் கொட்டப்படுகின்றன. அங்கே பொறுக்கப்படும் சீருடை எச்சங்களும் எலும்புகளும் பொறுக்கப்பட்டு காட்டுக்குள்ளோ வீதிக் கரைகளிலோ வீசப்படுகின்றன. பொதுமக்கள் நன்றாகப் பார்க்கவேண்டுமென்ற நோக்கத்திலும் துயிலுமில்லத்திலிருந்து வீதிக்கரைக்குக் கொண்டுவரப்பட்டு இவை ஒன்றாகப் போடப்படும் நிகழ்வும் தற்போது இடம்பெறுகிறது. தமிழ்மக்களின் ஆன்மாவைச் சீண்டிப்பார்த்துப் பரவசப்படும் ஒரு நிலையே தற்போது நடந்துகொண்டிருப்பதாக குறிப்பிட்ட அத்தமிழ்மகன் கண்ணீரோடு தெரிவித்தான்

கோசத்திற்குதான் தமிழ் தேசியம் தாயகம் சுயநிர்ணய உரிமை பற்றி த தே கூ சொல்கின்றது -கஜேந்திரகுமார் பொன்னம்பலம்

தமிழர்களின் தேசியம் தாயகம் சுயநிர்ணய உரிமை என்பவற்றை கோசமாகத்தான் தமிழ் தேசிய கூட்டமைப்பு சொல்கின்றதே அல்லாமல் அதன் உள்ளார்த்தமாக அதற்கு செயல்வடிவம் கொடுக்ககூடிய எந்த எண்ணமும் தற்போதைய அதன் தலைமைக்கு இல்லையென கஜேந்திரகுமார் பொன்னம்பலம் தெரிவித்துள்ளார். கனடா தமிழ் வானொலிக்கு வழங்கிய நேர்காணலிலேயே மேற்படி கருத்தை முன்னாள் தமிழ் தேசிய கூட்டமைப்பின் நாடாளுமன்ற உறுப்பினரும் தற்போதைய தமிழ் தேசிய மக்கள் முன்னனியின் நாடாளுமன்ற வேட்பாளருமான கஜேந்திரகுமார் பொன்னம்பலம் தெரிவித்துள்ளார். குறித்த நேர்காணலில் அவர் மேலும் தெரிவிக்கையில்: தமிழ் தேசிய கூட்டமைப்பு கடந்த வருடம் மே மாதத்திற்கு முன்னரே ஒரு தீர்வுதிட்டத்தை தயாரித்திருந்தது. ஆனாலும் அதனை வேறு நாடாளுமன்ற உறுப்பினர்களுக்கு தெரியப்படுத்தாமல் இருந்துவந்தார்கள். ஒஸ்லோ பிரகடனத்திற்கு அமைவாக தயாரிக்கப்பட்டிருப்பதாக இப்போது கூறுகிறார்கள். ஆனால் ஒஸ்லோ பிரகடனத்தை ஏற்றுக்கொள்ளமுடியாது என மாவை சேனாதிராஜாவுக்கு ஏற்கனவே தமிழீழ விடுதலைப்புலிகளின் தலைவர் வே. பிரபாகரனால் கூறப்பட்டிருந்தது. இடைக்கால தன்னாட்சி தீர்வு திட்டத்தின் அடிப்படையில் முயற்சிக்கலாம் ஆனால் ஒஸ்லோ பிரகடனத்தை ஏற்கமுடியாது என ஏற்கனவே தலைவரால் கூறப்பட்டிருந்தது. இத்தனை தியாகங்களுக்கு பின்னரும், மீண்டும் ஒரு நாடு என்ற கட்டமைப்புக்குள் தமிழர்களுக்கு ஒரு தீர்வை ஏற்றுக்கொள்ளமுடியாது. அதனால்தான் இரண்டு நாடுகளை கொண்ட ஒரு தேசம் என்ற அடிப்படையில் தீர்வை முன்னிலைப்படுத்தவேண்டும் என கேட்டுக்கொண்டேன். ஆனால் தமிழ் தேசிய கூட்டமைப்பின் தலைமையோ இந்தியாவினதும் பிறநாடுகளினதும் நிகழ்ச்சி நிரலுக்கமைவாகத்தான் தமிழர்களின் தீர்வை முன்வைக்கவேண்டும் என்ற அடிப்படையில் செயற்படுவது ஏற்றுக்கொள்ளப்படக்கூடியதல்ல. அப்படியானால் இவர்கள் தமிழ்மக்களின் தலைமைகளாக அல்லாமல் அவர்களின் கைப்பொம்மைகளாகத்தான் செயற்படப்போகிறார்கள். அதனால்தான் தமிழ் தேசிய கூட்டமைப்பின் தலைமைத்துவத்தை மாற்றும் நோக்குடன் அவர்கள் போட்டியிடுகின்ற யாழ்ப்பாணம் மற்றும் திருமலை மாவட்டங்களில் போட்டியிடுகின்றோம். மற்றைய மாவட்டங்களில் தமிழ் தேசிய கூட்டமைப்பின் வெற்றிக்கு உழைப்போம். பிழையான வழியில் செல்லும் தற்போதைய தமிழ் தேசிய கூட்டமைப்பை சரியான வழிக்கு நகர்த்திவருவதற்காகவே குறித்த இரண்டு மாவட்டங்களிலும் எதிர்த்து போட்டியிடுகின்றோம். - என்று தனது நேர்காணலில் மேலும் குறிப்பிட்டார்.

சிங்கள குடியேற்றங்களை தடுக்க மொடரேற்றர்ஸ் முன்வரவேண்டும்?

தற்போது விடுதலைப்புலிகளின் பிரசன்னம் இல்லாத நிலையில் அவர்களின் ஆயுத போராட்டம் பின்னகர்த்தப்பட்ட நிலையில்அவர்களின் கொள்கைகள் அல்லது உரிமைகளை வென்றெடுப்பதற்கான வழி முறைகள் தவறு என வாதிடுவோர் அதிகரித்துள்ளனர். குறிப்பாக மேற்கத்தைய சமூகம், அரசியல்வாதிகள், மனித உரிமைவாதிகள் இந்த வாதத்தினை முன்னிறுத்தி அதற்கு தமிழ் மக்களின் ஆதரவினை பெறுவதிலும் முனைப்பாக உள்ளனர். இதற்காக உள் நாட்டிலும் வெளி நாட்டிலும் MODARETORS என்ற தலைப்பு கொடுத்து வளர்ப்பதும் நாம் அறிந்த விடயம். சர்வதேசத்தின் இந்த திட்டம் இப்போது ஆரம்பிக்கப்படவில்லை அது 2002 இல் பேச்சுவார்த்தை ஆரம்பமாகின்ற போதே ஆரம்பிக்கபட்டது. அதாவது தமது திட்டங்களை நோக்கங்களை நிறைவேற்றுவதற்கு அல்லது திணிப்பதற்கு புலிகளின் பலத்தினை சிதறடிப்பது. மாற்று தலைமைகளை கொண்டு வருவது. மாற்று கருத்துக்களை கொண்டுவருவது. என அவர்களின் திட்டம் இருந்தது. இது உள் நாட்டிலும் வெளி நாட்டிலும் செயற்படுத்தப்பட்டே வந்தது. எனினும் விடுதலைப்புலிகளின் பலத்தினால் அதனை கடந்த காலங்களில் நிறைவேற்ற முடியாமல் போனது என்பதனையும் குறிப்பிடவேண்டும். ஆனால் தற்போது அனைத்துலகத்தின் இந்த திட்டம் இலகுவாக அடையக்கூடியனவாக இருக்கின்றது என்பதில் சர்வதேசத்திற்கு அளப்பரிய மகிழ்ச்சி. விடுதலைப்புலிகளின் பலம் அல்லது தமிழர்களின் ஆயுத பலம் என்பது மேற்குலகத்திற்கு பிரச்சினையாக இருந்தாலும் அதுதான் தமிழர்களின் அரசியல் கொள்கைக்கு, அரசியல் குறிக்கோளை அடைய முக்கியமானது ஆதாரமானது என்பதனை தமிழர்கள் நன்கு உணர்ந்திருந்தனர்.உணராதவர்கள் இப்போது உணர முற்படுவர். புலம்பெயர் தமிழர்களின் உணர்வை உள்வாங்கவேண்டும், அதனூடாக இலங்கை அரசுக்கு அழுத்தங்களை கொடுக்கவேண்டும் என நினைக்கும் சர்வதேச சமூகம் மிகவும் பெளவியமாக தமிழீழத்தினை ஆதரிப்பதாகவும் ஆனால் விடுதலைப்புலிகளை ஆதரிக்கவில்லை என்றும் கூறுகின்றது. இவ்வாறு கூறி புலிகளின் பலத்தினை அதாவது தமிழர்களின் தட்டிக்கேட்கும் சக்தியினை இல்லாது செய்வதில் சர்வதேசம் விடாப்பிடியாக உள்ளதனை பிரித்தானிய அமைச்சரான டேவிட் ஹன்சன் உரையில் இருந்து அறிய முடிகின்றது. கூடவே அண்மையில் ஜேர்மனி உட்பட பல வெளி நாடுகளில் மேற்கொள்ளப்படும் இயக்க ஆதரவாளர்கள் மீதான நடவடிக்கைகளையும் குறிப்பிடலாம். இங்கு ஒன்றினை குறிப்பிடவேண்டும் தமிழர்களின் அரசியல் அபிலாசைகளை ஏற்றுக்கொள்வதாக கூறும் சர்வதேச சமூகம் அந்த அபிலாசைகளை நடைமுறைப்படுத்தும் பூகோள அமைவிடம் இலங்கைதான் என்பதனை மறந்து விட்டனரா? ஏனெனில் எதற்காக தமிழர்கள் போராடுகின்றார்களோ அல்லது எதற்காக தமது உரிமைக்குரலினை எழுப்புகின்றார்களோ அதனை ஜன நாயக முறைப்படி செய்யுங்கள் என ஆலோசனை கூறும் சர்வதேச சமூகம்; தாயகத்தில் ஆயுத முனையில் , இராணுவ அச்சுறுத்தலின் மூலம் தமிழர் தாயகம் விழுங்கப்படுகின்றது. சிங்கள குடியேற்றம் செய்யப்படுகின்றது. இன வீதாசாரம் கிழக்கை போன்று வடக்கிலும் நிச்சயம் மேற்கொள்ளப்பட்டுவருகின்றது. ஆகவே இந்த இன வீதாசார மாற்றம் நடந்த பின்னர் உங்கள் உரிமைகளை ஜன நாயக ரீதியில் பெறுங்கள் என்றால் சாத்தியமா? இலங்கை அரசாங்கம் கூட, ஏன் யாப்பு ரீதியாக தமிழர்கள் பிரிந்து செல்லலாம் என்று மாற்றம் கொண்டுவந்தால் கூட முடியாது. காரணம் அங்கு பெரும்பான்மையானவர் சிங்களவர்களாகவே இருப்பார்கள். ஆகவே மேற்குலகத்தின் இந்த பூச்சாண்டி விளையாட்டுக்களை தமிழர்கள் ஏற்றுக்கொள்ளப்போகின்றார்களா? , ஜன நாயகம் அல்லது சாத்தியமான வழிகள் அல்லது மேற்குலகத்துடன் ஒத்து போகவேண்டும் என்ற அடிப்படையில் எவ்வளவு காலம் செல்லப்போகின்றோம்? அதுவரைக்கும் தமிழர் தாயகப்பகுதிகளில் சிங்கள குடியேற்றத்தினை தடுக்க என்ன உத்தரவாதம்? ஏதாவது சர்வதேசம் அதுபற்றி கதைக்கின்றார்களா? இதுவரை நடந்த கூட்டங்கள், கருத்தரங்குகள் ஆகியவற்றில் இவை எதுவும் உள்ளடக்கபடவில்லையே ஏன்? பாலஸ்தீனத்தில் இஸ்ரேலியர்கள் வீடுகட்டுவதனை தட்டி கேட்கும் நாடுகள் ஏன் தமிழர் தாயக சிங்கள குடியேற்றம் பற்றி பேசுவதில்லை. பாலஸ்தீனத்தில் குடியேற்றத்தினை தற்காலிகமாவது நிறுத்தவேண்டும் என மேற்குலகம் கூறுகின்றது அல்லவா. ஆனால் தமிழர்களை ஜன நாயகமாக போராடுங்கள் என கூறும் சர்வதேச சமூகம் இலங்கையில் தமிழர் நிலங்களில் சிங்கள குடியேற்றங்கள் நடைபெறுவதனை ஏன் கருத்தில் எடுக்கவில்லை? தமிழர்களின் ஆயுத போராட்டம் வன்முறை என்றும் பயங்கரவாதம் என்றும் அதனை தடைசெய்து ஒழித்த பெருமை சர்வதேசத்தினையே சாரும் அந்த வகையில் சர்வதேசம் தான் தாயகத்தில் தமிழர் நிலங்கள் மீதான சிங்கள குடியேற்றங்களை தடுக்க வேண்டும். இல்லையேல் தமிழர்கள் அதனை தடுக்க ஆதரவு வழங்கவேண்டும். ஆக குறைந்தது தமிழர் பிரச்சினைக்கு அரசியல் தீர்வு கிடைக்கும்வரையாவது தமிழர் பிரதேசங்களில் சிங்கள குடியேற்றங்களை நிறுத்தவேண்டும் என கேட்கவேண்டும். ஜன நாயக ரீதியில் , இலங்கையில் இவ்வாறான போராட்டங்களை செய்ய முடியாது அல்லது மாற்றங்களை கொண்டுவர முடியாது என்பதனை எவரும் மறுக்க முடியாது. ஆகையால் சர்வதேசத்துடன் சேர்ந்து சன நாயக ரீதியாக போராடுவோம் என புறப்படும் தமிழர்கள்; அதற்காக அமைப்புக்களை உருவாக்கி கவர்ச்சியாக விளம்பரம் செய்து மக்களை உள்வாங்கும் அமைப்புக்கள், தம்மை உலக ஒழுங்குக்கு ஏற்ப செயற்படும் புத்திசாலிகள் என கூறுபவர்கள் அனைவருமே இந்த பொறுப்பினை ஏற்க வேண்டும். தாயகத்தில் சிங்கள குடியேற்றம் முற்றுமுழுதாக முடுக்கி விடப்பட்டுள்ள நிலையில் அதனை கருத்தில் எடுக்காது சர்வதேசம் ஓட்டம், இந்தியாவின் ஆதரவு என கூறிக்கொண்டு இருப்பவர்கள் இதனை நிச்சயமாக கருத்தில் எடுக்கவேண்டிய தேவை உள்ளது. தாயகத்தில் இனவீதாசார மாற்றம் ஏற்பட்ட பின்னர் உங்கள் ஜன நாயகம், போராட்டம், சர்வதேசத்துடன் ஒத்து போதல், இந்திய ஆதரவு என்ற எதுவுமே எடுபடப்போதில்லை என்பதனை புரிந்து செயற்படவேண்டும். 30 வருடமாக புலிகளால் செய்ய முடியாததனை நாம் எட்டு மாதத்தில் செய்ய முடியுமா? என புத்திசாலித்தனமாக கேளிவியினை கேட்டு தங்களை நியாயப்படுத்த முயலும் உள் நாட்டு, புலம்பெயர் தமிழர்கள் ஒன்றினை கவனத்தில் கொள்ளவேண்டும். புலிகள் காலத்தில் சிங்கள குடியேற்றங்கள் அப்புறபடுத்தப்பட்டன, புதிதாக ஆரம்பிக்க திட்டங்கள் இருந்தாலும் நடைமுறைபடுத்தப்படவில்லை என்பதனை கவனத்தில் எடுக்கவேண்டும். புலிகள் 30 வருடம் போராடியது போன்று நாமும் 30 வருடம் ஜன நாயக ரீதியாக போராடிய பின்னரே நீங்கள் கேள்விகளை கேட்கலாம் என்றால் அதற்கு ஆம் என சொல்லலாம் ஆனால் அதற்குள் தமிழர் தாயகம் சிங்கள மயமாகாமல் இருக்குமா?

இனவெறித்தாக்குதல்களுக்கு ஐ.நா கண்டனம்.

ஆஸ்திரேலியா வில் தொடர்ந்து இந்தியர்கள் மீது நடந்துவரும் தாக்குதல்களும், இலங்கையில் தமிழர்களுக்கு எதிரான தொடரும் மனித உரிமை மீறல்களும் பெரும் கவலை தருவதாகவும், இவை கண்டனத்துக்குரியவை என்றும் ஐ.நா. மனித உரிமை ஆணையர் நவநீதம்பிள்ளை தெரிவித்துள்ளார். இதுகுறித்து நவநீதம்பிள்ளை கூறுகையில், ஆஸ்திரேலியாவில் இந்தியர்கள் மீது தொடர்ந்து தாக்குதல்கள் நடந்து வருவது கவலை அளிப்பதாக உள்ளது. ஆஸ்திரேலிய நிர்வாகம், இந்தத் தாக்குதலின் மூல காரணம் என்ன என்பதைக் கண்டறிய வேண்டும். தேசிய அளவிலும், மாகாண அளவிலும் ஒருங்கிணைந்த நடவடிக்கைகளை ஆஸ்திரேலிய அரசு மேற்கொள்ள வேண்டும். விசாரணை மற்றும் தண்டனைகளில் தீவிரம் காட்டப்பட வேண்டும். இதுபோன்ற வன்முறைகளைத் தடுப்பதற்கான வழிமுறைகள் காணப்பட வேண்டும்.

பெண்ணுக்கு இடையூறு விளைவித்த 4பொலிஸார் கைது

நேற்று இரவு மவுண்ட் லாவணியா கடற்கரையிலுள்ள மதுக்கடைக்கு அருகில் தனிமையில் நின்ற பெண்ணைக் கிண்டலடித்து தொந்தரவு செய்த பொலிஸார் நால்வர் கைது செய்யப்பட்டுள்ளனர். நேற்றிரவு அவர்கள் நால்வரும் மதுவருந்தி விட்டு மேற்படி பெண்ணுக்கு தொந்தரவு கொடுத்துள்ளனர். இதனால் கோபமுற்ற பெண்ணின் உறவினர்கள் மவுண்ட் லாவணியா பொலிஸ் நிலையத்தில் கொடுத்த முறைப்பாட்டின் அடிப்படையில் நால்வரும் கைது செய்யப்பட்டு அவர்கள் மதுவருந்தியதை உறுதிப்படுத்துவதற்காக மருத்துவ பரிசோதனைக்கு உள்ளாக்கப்பட்டனர். இதேவேளை தொந்தரவுக்கு உள்ளான அந்தப் பெண்ணும் மது அருந்தியிருந்தாரா? எனச் சோதிக்கப்பட்டுள்ளது. நேற்றிரவு கைது செய்யப்பட்ட நான்கு பொலிஸாரும் மவுண்ட் லாவணியா குற்றத்தடுப்பு பிரிவைச் சேர்ந்தவர்கள் என்பது குறிப்பிடதக்கது. மக்களிடையே நடக்கும் குற்றங்களை தடுக்கவென நியமிக்கப்படும் பொலிஸாரே தற்போது அதிகமாகக் குற்றங்கள் புரிந்து வருவது இலங்கையில் அதிகரித்து வரும் ஒருபோக்காக காணப்படுகிறது.

தாயகக் கொள்கையை ஆதரிக்க பிரி.வாழ் தமிழர்களுக்கு உரிமை உள்ளது

தமிழர் தாயகக் கொள்கையை ஆதரிப்பதற்கு பிரிட்டனில் உள்ள தமிழர்களுக்கு உரிமை உள்ளது என்று அந்த நாட்டின் பயங்கரவாத எதிர்ப்பு நடவடிக்கைகளுக்கான அமைச்சர் டேவிட் ஹன்சன் அறிவித்துள்ளார். அதேவேளை, விடுதலைப் புலிகளுக்கு ஆதரவளிப்பது சட்டவிரோதமானது என்பதையும் அவர் வலியுறுத்தியுள்ளார். பயங்கரவாத ஒழிப்பு தடுப்புச் சட்டமூலம் நேற்று முன்நாள் பிரிட்டிஷ் நாடாளுமன்றத்தில் விவாதத்துக்கு எடுத்துக்கொள்ளப்பட்ட வேளையே அமைச்சர் இதனைத் தெரிவித்தார். இந்த விவாதத்தில் கலந்துகொண்டு உரையாற்றிய தொழிற்கட்சி நாடாளுமன்ற உறுப்பினர் கீத் வாஸ், விடுதலைப் புலிகள் இயக்கம் முற்றாக அழிந்துபோன பின்னரும் ஏன் தடைசெய்யப்பட்ட இயக்கங்களின் பட்டியலில் அதனை வைத்திருக்கிறீர்கள் எனக் கேள்வி எழுப்பினார். அதற்குப் பதிலளிக்கையிலேயே அமைச்சர் டேவிட் ஹன்சன் மேற்கண்டவாறு பதிலளித்தார். பிரிட்டிஷ் நாடாளுமன்றத்தில் கீத் வாஸ் உரையாற்றுகையில் தெரிவித்தவை வரு மாறு: பிரிட்டிஷ் அரசு தடைசெய்யப்பட்ட இயக்கங்களின் பட்டியலைத் தொடர்ந்து பரிசீலிக்க வேண்டும். விடுதலைப் புலிகள் இயக்கம் தடைசெய்யப்பட்ட விடயம் குறித்து அனைவரும் அறிவோம். அனைவரையும் பொறுத்தவரை விடுதலைப் புலிகள் இயக்கம் அற்றுப்போய் விட்டது. இலங்கை அரசே இது குறித்து நம்பிக்கையாகவுள்ளது. இப்படியான சூழ்நிலையில் அந்த இயக்கத்தைத் தொடர்ந்து ஏன் தடைசெய்யப்பட்ட அமைப்புகளின் பட்டியலில் பிரிட்டன் வைத்திருக்க வேண்டும்? விடுதலைப்புலிகள் இயக்கம் தடை செய்யப்பட்டுள்ளதால் அதனுடன் தொடர்பில்லாத அமைப்புகளும் பாதிக்கப்பட்டுள்ளன. இந்த அமைப்புகள் நிகழ்ச்சிகளை நடத்துவதற்கான அனுமதி மறுக்கப்படுகிறது. இவ்வாறான தமிழ் அமைப்புகளின் தலைவர்கள் கூட விசாரணைக்கு உட்படுத்தப்பட்டுள்ளனர் என்றார். இதற்குப் பதிலளித்த பயங்கரவாத எதிர்ப்பு நடவடிக்கைகளுக்கான அமைச்சர் டேவிட் ஹன்சன் குறிப்பிட்டவை வருமாறு: பிரிட்டனில் பயங்கரவாத தடைச் சட்டம் கொண்டு வரப்பட்ட 2000ஆம் ஆண்டு முதல் விடுதலைப்புலிகள் இயக்கம் இங்கு தடைசெய்யப்பட்டுள்ளது. 1970 ஆம் ஆண்டிலிருந்து அந்த அமைப்பு தமிழர் தாயகத்தை உருவாக்கும் தனது முயற்சிக்காகப் பல பயங்கரவாத செயல்களில் ஈடுபட்டுள்ளது. விடுதலைப் புலிகளுக்கு ஆதரவு வழங்குவது சட்டவிரோதமானது என்ற போதிலும் தமிழ் சமூகத்துக்கு தமிழர் தாயகக் கொள்கையை ஆதரிப்பதற்கான உரிமை உள்ளது. இந்த விடயம் தொடர்பாகத் தமது கருத்துக்களை தெரியப்படுத்துவதற்கும் தமிழ் மக்களுக்கு உரிமை உண்டு. பிரிட்டனுக்கு கருத்துச் சுதந்திரம், ஒன்று கூடுவதற்கான சுதந்திரம் ஆகியவை குறித்த நீண்ட பாரம்பரியமுள்ளது. மேலும் தமிழர்களின் அபிலாஷைகளை ஆதரிப்பவர்கள் இதனை நாடாளுமன்ற சதுக்கத்தில் வெளிப்படுத்த அனுமதியளிக்கப்படுவது அவசியமானது. தடைசெய்யப்பட்ட அமைப்புகளைத் தனிநபர்கள் ஆதரவளித்தால் அவர்களுக்கு எதிராக நடவடிக்கை எடுக்கலாம். ஆனால் நாடாளுமன்ற சதுக்கத்தில் தனி நபர்கள் ஆர்ப்பாட்டம் செய்வது குறித்து எந்தப் பிரச்சினையும் இல்லை. நாங்கள் தடைசெய்யப்பட்ட அமைப்புகளின் பட்டியலை வைத்துள்ளோம். எனினும், விடுதலைப்புலிகள் இயக்கம் தொடர்பாக உள்துறை அமைச்சர் தொடர்ந்தும் ஆராய்ந்து வருவார். மேலும் தடைகளை அகற்றுவதற்கும் அவரிடம் விண்ணப்பிக்கலாம் என்றார்.

நிலநடுக்கத்தால் பூமியின் மையக்கோட்டில் பாதிப்பு

சிலி நாட்டில் கடந்த பிப்ரவரி 27ஆம் தேதி ஏற்பட்ட 8.8 ரிக்டர் நிலநடுக்கம் காரணமாக பூமியின் மையக்கோட்டில் பாதிப்பு ஏற்பட்டுள்ளது. இதனால் ஒரு நாளின் மொத்த கால அவகாசத்தில் 1.26 மைக்ரோ செகண்ட் குறையும் என நாசா விஞ்ஞானிகளின் முதற்கட்ட கணிப்புகள் தெரிவிக்கின்றன. இதுதொடர்பாக சி.என்.என் தொலைக்காட்சி வெளியிட்டுள்ள செய்தியில், பயங்கர நிலநடுக்கம் ஏற்படும் போது பூமியில் உள்ள பாறைகள் இடம்பெயரும். இதன் காரணமாக பூமி சுழலும் வேகம் மாறுவதால், ஒருநாளின் கால அவகாசமும் மாறுபடும். நாசாவில் பணியாற்றும் புவியியல் விஞ்ஞானி ரிச்சர்ட் க்ராஸ் என்பவர் கணினியின் உதவியுடன் நடத்திய ஆய்வில், கடந்த பிப்ரவரி 27ஆம் தேதி சிலியில் ஏற்பட்ட 8.8. ரிக்டர் நிலநடுக்கம் காரணமாக பூமியின் மையக்கோடு 8 செ.மீ. சாய்ந்துள்ளதையும், இதன் காரணமாக நாளின் காலஅவகாசம் 1.26 மைக்ரோ செகண்ட் அளவு குறைந்துள்ளதையும் கண்டறிந்துள்ளார். கடந்த 2004இல் இந்தோனேஷியாவில் ஏற்பட்ட 9.1 ரிக்டர் நிலநடுக்கத்தால் பூமியின் சுழலும் வேகம் அதிகரித்தது. அதனால் நாளின் காலஅவகாசம் 6.8 மைக்ரோ செகண்ட் குறைந்தது குறிப்பிடத்தக்கது.

பிலிப்பைன்ஸ், கிர்கிஸ்தானில் இன்று நில நடுக்கம்

தென்அமெரிக்க நாடான சிலியில் கடந்த சனிக்கிழமை ஏற்பட்ட நில நடுக்கத்தில் 800-க்கும் மேற்பட்டோர் பலியானார்கள். சிலியில் நில நடுக்கம் ஏற்பட்ட அதே நேரத்தில் பாகிஸ்தான், ஆப்கானிஸ் தான் மற்றும் இந்தியாவில் காஷ்மீர் பகுதியிலும் நில நடுக்கம் ஏற்பட்டது.இந்த நில நடுக்கம் பீதி அடங்குவதற்குள் இன்று பிலிப்பைன்ஸ் மற்றும் கிர்ஜிஸ்தான் நாடுகளில் நில நடுக்கம் ஏற்பட்டுள்ளது. பிலிப்பைன்ஸ் நாட்டில் உள்ள காகயன், இசபெல்லா ஆகிய பகுதிகளில் காலை 7 மணியளவில் பூமி அதிர்ந்தது. இதில் வீடுகள் சில வினாடிகள் குலுங்கின. நில நடுக்கம் ஏற்பட்டதை உணர்ந்ததும் மக்கள் அலறியடித்து வீட்டை விட்டு வெளியே ஓடினார்கள். நில நடக்கம் ரிக்டர் ஸ்கேல் அளவுக்கு 6.1 புள்ளிகளாக பதிவாகி இருந்தது. இதில் சேதம் ஏதும் ஏற்பட்டதா? என்பது குறித்து இதுவரை தகவல் இல்லை. ரஷியாவில் இருந்து பிரிந்து சென்ற நாடான கிர்கிஸ்தானில் இன்று காலை 7.25 மணியளவில் லேசான நிலநடுக்கம் ஏற்பட்டது. தலைநகரமான பிஷ்கேக்கிலி 5 ரிக்டர் அளவில் நிலநடுக்கம் பதிவாகியுள்ளது. இதனால் கட்டிடங்கள் மற்றும் வீடுகள் குலுங்கின. அதிர்ச்சி அடைந்த மக்கள் வீடுகளை விட்டு வெளியேறி சிறிது நேரம் ரோடுகளில் தஞ்சம் அடைந்தனர். நில நடுக்கத்தால் ஏற்பட்ட சேத விவரங்கள் எதுவும் வெளியிடப்படவில்லை.

மீன் செதில்களுடன் அதிசய குழந்தை

மேற்கு சீனாவில் உள்ள ஜின்ஹ¨ நகரை சேர்ந்தவன் சாங்ஷெங். இவன் கடந்த 14 மாதங்களுக்கு முன்பு பிறந்தான். பிறக்கும்போது அவனது உடலில் முடி வளர்வதற்கான மயிர்க்கால்கள் எதுவும் இல்லை. இதனால் உடலில் இருந்து வியர்வை வெளியேறாமல் மிகவும் அவதிப்பட்டு வந்தான். இந்த நிலையில் அவனது உடலில் மீன் போன்ற செதில்கள் வளர தொடங்கியது. இதனால் அதிர்ச்சி அடைந்த பெற்றோர் அவனை டாக்டர்களிடம் சென்று காட்டினர். பரிசோதனை செய்த டாக்டர்கள் மிகவும் குழப்பம் அடைந்தனர். அவனுக்கு ஏற்பட்டுள்ள நோயை அவர்களால் கண்டுபிடிக்க முடியவில்லை. ஆனால் உடலில் இருந்து வெப்பத்தை குறைக்க அவன் மிகவும் சிரமப்பட வேண்டியது இருக்கும். இதற்காக அவனை ஐஸ்கட் டிக்குள் வைக்க வேண்டிய நிலை ஏற்படும். இதுஒருவகை மரபுநோய் என்றும் தெரி வித்தனர். இவனை அனை வரும் மீன் சிறுவன் என்றே அழைக்கின்றனர்.

“ஆண்களைவிட பெண்களே புத்திசாலிகளாக உள்ளனர்”

“ஆண்களைவிட பெண்களே புத்திசாலிகளாக உள்ளனர்’ என்று லண்டனில் ஆன்-லைன் மூலம் நடத்தப்பட்ட பந்தயத்தில் தெரியவந்துள்ளது.பிரிட்டன், லண்டனை சேர்ந்த ஒரு அறிவுப்பூர்வ பந்தய அமைப்பு, ஆண், பெண் இரு பாலரில் யார் புத்திசாலிகள், அறிவுக்கூர்மையானவர்கள் என்பதை அறிய வித்தியாசமான பந்தயம் ஒன்றை ஆன்-லைனில் நடத்தியது. பந்தய முடிவில் ஆண்களுக்கு கசப்பான செய்தியே கிடைத்தது. ஆண்களைவிட பெண்கள் தான் புத்திசாலிகள் என்று முடிவு வெளியாயின. லண்டனை சேர்ந்த இந்த அமைப்பு ஆன்-லைனில் இந்த பந்தயத்துக்கு ஏற்பாடு செய்திருந்தது. ஆங்கிலம், பிரெஞ்சு, ஜெர்மன், ஸ்பானிஷ், டச்சு, பின்லாந்து, நார்வே, சுவீடன், டானிஸ் ஆகிய ஒன்பது மொழிகளில் இந்த போட்டித் தேர்வை நடத்தியது.இயற்கை, அறிவியல், வரலாறு, புவியியல், கலை, இலக்கியம், விளையாட்டு, பொழுதுபோக்கு அம்சம், மக்கள், முக்கிய இடங்கள் இவை சம்பந்தமாக விஞ்ஞானபூர்வமற்ற முறையில் பொழுதுபோக்கான கேள்விகளை தயாரித்தது.மொத்தம் ஒன்றரை லட்சம் கேள்விகளை தயார் செய்திருந்தது. ஆன்-லைன் மூலம் பதிலளிக்க ஒவ்வொரு கேள்விக்கும் தலா 20 வினாடிகள் ஒதுக்கியது.பதிலளித்த ஆண்கள், பெண் இரு பாலரும் மாறி மாறி கூடுதலாகவும் குறைச்சலாகவும் பதிலளித்தனர். முடிவில் ஆண்களைவிட பெண்கள் தான் அதிக கேள்விகளுக்கு பதிலளித்திருந்தனர். பெண்கள் 40,88,139 கேள்விகளுக்கும், ஆண்கள் 40,77,596 கேள்விகளுக்கும் சரியான பதிலை அளித்திருந்தனர்.பெண்கள் பொழுதுபோக்கு பிரிவில் 57 சதவீத கேள்விகளும், இயற்கை மற்றும் அறிவியல் பிரிவில் 55 சதவீத கேள்விகளுக்கும் சரியான பதிலை அளித்திருந்தனர். மக்கள், முக்கிய இடங்கள் பிரிவில் 42 சதவீத கேள்விகளே சரியான பதிலை அளித்திருந்தனர். ஆண்கள் இயற்கை, பொழுது போக்கு, அறிவியல், விளையாட்டு போன்ற துறையில் சிறப்பாக பதிலளித்திருந்தனர்.